НыбжьыкIэхэм япатриотическэ пIуныгъэ, Кавказым изэкъош лъэпкъхэм язэпхыныгъэ игъэпытэн афэгъэхьыгъэ проектым диштэу Адыгеим иныбжьыкIэ куп Абхъаз Республикэм щыIагъ.

[caption id="attachment_137854" align="aligncenter" width="800"] Сурэтыр: АР-м и ЛIышъхьэ ипресс-къулыкъу[/caption]

«Мыекъуапэ инэфылъэхэр» зыфиIорэ къэшъокIо купым исолистхэр спорт-зыгъэпсэфыпIэ лагерым езгъэблэгъагъэхэр абхъаз лъэпкъ паркэу «Апсны» ипащэу Мзауча Пилия ыкIи организациеу «Аспар» ипащэу Абба Нарт. Мафэ къэс ныбжьыкIэхэр спорт ыкIи культурнэ Iофтхьэбзэ зэфэшъхьафхэм ахэлэжьагъэх, щэбзэщэ онымкIэ, къашъохэмкIэ зэнэкъокъугъэх. НыбжьыкIэу нэIуасэ зэфэхъугъэхэр Абхъазым ичIыопс ичIыпIэ хьалэмэтхэр къызэдакIухьагъэх, адыгэ-абхъаз зэкъош зэфыщытыкIэхэм ятарихъ зэрагъэшIагъ, «Абхъаз-адыгэ хыдзэ галерэр» зыфиIорэ проектым зыщагъэгъозагъ. Абхъазым иэтнопарк ихъарзынэщ къыхэхыгъэ сурэтхэм атешIыкIыгъэ паруснэ къухьэу ашIыгъэр хьакIэхэм арагъэлъэгъугъ. А къухьэм исхэу ныбжьыкIэхэр псым техьагъэх. Зэман чыжьэхэм адыгэхэмрэ абхъазхэмрэ язэфыщытыкIэхэр зыфэдагъэм, якIуачIэ, яамалхэр зынэсыщтыгъэхэм защагъэгъозэн алъэкIыгъ.

[caption id="attachment_137855" align="aligncenter" width="800"] Сурэтыр: АР-м и ЛIышъхьэ ипресс-къулыкъу[/caption]

«Мыщ фэдэ зэпхыныгъэхэм зэкъош лъэпкъхэр нахь зэпэблагъэ ашIых, ныбжьыкIэхэр зэрэшIэх. Ащ осэшхо фэпшIынэу щыт. Титарихъ тэгъэлъапIэ, тилъэпкъхэм шIуагъэ къафэзыхьыщт проектхэр зэхэтщэнхэм тафэлэжьэщт», — хигъэунэфыкIыгъ АР-м и ЛIышъхьэу КъумпIыл Мурат.