Адыгеим и «НыбжьыкIэ Гвардие» анахь чанэу хэлажьэхэрэм Урысыем и Къэралыгъо быракъ и Мафэ ехъулIэу къэлэ паркым Урысыем ибыракъэу метрэ 15-рэ хъурэр къыщызэкIоцIахыгъ.

«Быракъыр къэралыгъо тамыгъэу щыт, хэгъэгум лIэшIэгъубэ хъурэ тарихъ гъогоу къыкIугъэм ар ишыхьат ыкIи цIыфыбэ зэрепхы. Мы Iофтхьабзэр пстэуми апэу зыфэгъэхьыгъэр республикэм имызакъоу, зэрэ Урысыеу патриотизмэр щыгъэпытэгъэныр, ныбжьыкIэхэр яхэ­гъэгу фэшъыпкъэхэу пIугъэнхэр ары. Партиеу «Единэ Россием» ипрограммэ къыдилъы­тэ­­­рэ лъэныкъохэм зыкIэ ащыщ мы Iоф­тхьабзэу цIыфхэр яхэгъэгу фэшъыпкъэхэу пIугъэнхэм фэгъэхьыгъэр», — къыIуагъ Адыгеим и «НыбжьыкIэ Гвардие» иштаб хэтэу Даниил Кушнарь.

Ащ нэужым къалэм щыпсэухэрэмрэ хьакIэхэмрэ апае мэфэкI программэр аублагъ. Ащ Iофыгъо зэфэшъхьафхэм афэгъэхьыгъэ зэнэкъокъухэр, Урысыем итамыгъэ зытет Iэпэщысэхэм яшIынкIэ мастер-классхэр хэтыгъэх. Мафэм къыкIоцI цIыфэу блэкIыхэрэм Урысыем и Къэралыгъо быракъ итамыгъэу щыт лентэхэр аратыщтыгъэх, джащ фэдэу мэфэкIэу къэблагъэрэм пае афэгушIощтыгъэх.

«Илъэс къэс ныбжьыкIэ анахь чанхэр тигъусэхэу Урысыем и Къэралыгъо быракъ и Мафэ ехъулIэу Iофтхьэбзэ зэфэшъхьафхэр зэхэтэщэх. Непэ ахэр тигъусэ­хэу быракъым и Мафэ зыкIызэхатщэрэр Хэгъэгушхом изы Iахьхэу зэрэщытхэр джыри зэ зэхашIэным пай», — къы­Iуагъ партиеу «Единэ Россием» и Генеральнэ совет хэтэу, Адыгеим и «НыбжьыкIэ Гвардие» ипащэу Бэрзэдж Асиет.