Урысые Федерацием ит гурыт еджапIэхэр сэнэхьатыр къыхэхы­гъэным епхыгъэ IофшIэным изыкI шапхъэ техьанхэм ипроект УФ-м просвещениемкIэ и Министерствэ егъэцакIэ.

Лъэпкъ проектэу «Гъэсэныгъэм» ифедеральнэ проектэу «КIэлэцIыкIу пэпчъ игъэхъагъ» зыфиIорэм ар къыдыхэлъытагъ, я 6 — 11-рэ классхэм ащеджэрэ кIэлэеджакIохэм афытегъэпсы­хьагъ.

Гъэсэныгъэ организацие пэпчъ шъхьадж зыфэе лъэныкъор къыхехы. Базовэм къыдыхэлъытагъэу илъэсым сыхьат 40-м къыщымыкIэу, лъэныкъо шъхьаIэр сыхьат 60-м нэсэу, нахь игъэкIотыгъэу зыщызэрагъашIэрэм сыхьат 80-м телъытагъэу егъэджэнхэр афызэхащэщтых.

Адыгеим ит гъэсэныгъэм иучреждении 129-мэ зыкI шапхъэр агъэфедэщт. Экологобиологическэ лицееу N 35-м ар нахь игъэкIотыгъэу щызэ­хащэщт. Гъэсэныгъэ учреждениитIумэ лъэныкъо шъхьаIэу, адрэхэм зэкIэми базовэу къащызэIуахыщт.

Урокым хэхьэрэ IофшIэныр

Еджэгъу сыхьатхэм къады­хэлъытагъэу гурыт еджапIэм щызэрагъэшIэрэ предметхэм япхыгъэхэу, гущыIэм пае физикэм, химием, хьисапым ыкIи нэмыкIхэм кIэлэеджакIохэм яшIэныгъэхэм ахагъэхъощт. Мы лъэныкъомкIэ урок тедзэхэр зэхащэщтхэп, еджэгъу планым диштэу пстэури кIощт.

Гъэсэныгъэ тедзэр

Мыщ онлайн-диагностикэхэр хэхьэх. Ащ къыдыхэлъытагъ профориентационнэ урокхэр, проектнэ IофшIэнхэр, профориентационнэ программэр, клас­снэ сыхьатхэр (ащ хэхьэ онлайн-урокэу «Шоу профессий» зыфиIорэр), зэдэгущыIэгъухэр, мастер-классхэр, джэгукIэ зэ­фэшъхьафхэр ыкIи нэмыкIхэр.

ПIуныгъэр

Мы лъэныкъом къыдыхэлъытагъэу IофшIэпIэ чIыпIэ зэфэшъхьафхэр ныбжьыкIэхэм къарагъэкIухьащтых, апшъэрэ ыкIи гурыт сэнэхьатхэр защарагъэгъотырэ гъэсэныгъэ учреждениехэм арагъэблэгъэщтых, лекциехэр афызэхащэщтых, профориентационнэ къэгъэлъэгъонэу «Лаборатория будущего» зыфиIорэм ащэщтых. НэмыкI къэгъэлъэгъонхэм, ермэлыкъхэм, гъэсэныгъэ учреждениехэм ащызэхащэрэ пчъэ зэIухыгъэм имафэ арагъэблэгъэщтых, технологием епхыгъэ зэIухыгъэ урокхэм ахэлэжьэщтых ыкIи сэнэхьат зэфэшъхьаф зиIэ цIыф цIэрыIохэм аIуагъэкIэщтых.

Сэнэхьатыр къыхэхыгъэнымкIэ зэнэкъокъухэр зэхэ­щэгъэнхэр шапхъэм къыделъытэ. Ащ хэхьэх Юнармиер, проектхэу «Урысыер — амалышIухэр зыIэкIэлъ къэралыгъу», «Абилимпикс», «Профессио­налы» зыфиIохэрэр ыкIи нэ­мыкIхэр.

Сэнэхьатым епхыгъэ егъэджэнхэр

Мы лъэныкъом хэхьэ ныбжьыкIэхэр сэнэхьат зэфэшъхьафхэм нэIуасэ афэхъунхэр, агъэфедэрэ Iэмэ-псымэхэм Iоф рашIэшъунэу гъэсэгъэнхэр, нэмыкIхэри. Джащ фэдэу IофышIэ къызэрыкIохэм агъэцакIэрэм нэIуасэ афашIыщтых.

Ны-тыхэм зэпхыныгъэ адыряIэныр

Мы лъэныкъом къыдыхэлъытагъэу ны-тыхэм Iоф адашIэщт, егъэджэнхэр афызэхащэщтых, электроннэ почтэмкIэ къэбарыкIэхэр афарагъэхьыщтых.