МетеокомплекситIу станциеу «Джуга» зыфиIорэр Кавказ биосфернэ запо­ведникым зыщагъэуцугъагъэр илъэс 50-м ехъугъ.

[caption id="attachment_137804" align="aligncenter" width="800"] Сурэтыр: Кавказ биосфернэ запо­ведникыр.[/caption]

БэмышIэу джыри заповедникымрэ компаниеу «Минимакс-94» зыфи­Iорэмрэ агрометеостанциитIу кIэу ащ щагъэпсыгъ.

Заповедникым ипресс-къулыкъу къызэритыгъэмкIэ, ахэм заповедникым иIофышIэхэмкIэ мэхьанэшхо яI, сыда пIомэ мафэ къэс зыгъэ­псэфакIохэр къушъхьэхэм ахащэнхэм ыпэ ом изытет зыфэдэр пэшIорыгъэшъэу зэрагъэшIэн амал яIэ хъугъэ.

Метеокомплексхэм жьыбгъэм илъэ­шыгъэ, температурэр зыфэдизыр, ощх-осхэр щыIэщтхэмэ къа­гъэлъагъо. Ахэм ялъытыгъэу зекIо лъагъоу хьакIэхэм къафыхахыщтхэр, зыдаштэщт щыгъынхэр зыфэдэщтхэр, къызщыуцунхэ алъэкIыщт чIыпIэхэр зекIозещэхэм агъэнафэх.

Станциехэм ом изытет зэхъокIыныгъэу фэхъухэрэр сыхьат пэпчъ къагъэлъагъо. Арышъ, кордонэу Лаурэрэ хыкъумэу Зеркальнэмрэ ащыхъурэр онлайн шIыкIэм тетэу зэбгъэлъэгъунхэ плъэкIыщт, джащ фэдэу заповедникым исайти иплъэгъощтых.

Метеостанциехэм ягъэпсынкIэ лъэпкъ проектэу «Экологием» ишIуа­гъэ къэкIуагъ. Станциехэм шъхьафитэу, зыми емыпхыгъэхэу Iоф ашIэ, тыгъэнэбзыйхэм къапыкIырэ фабэм къытырэ энергиер агъэфедэ. Спе­циалистхэм къызэраIорэмкIэ, илъэсым мэфэ фабэхэр зыщынахьыбэ чIыпIэхэр ары станциехэр зыща­гъэуцугъэхэр, ахэр мэфэ 60 — 70-м нэсых.