Рагъэджэщтхэм ахагъэхъощт
Адыгэ къэралыгъо университетым зекӀоным ылъэныкъокӀэ гурыт профессиональнэ гъэсэныгъэ щызэзыгъэгъотыхэрэм япчъагъэ 2025-рэ илъэсым ехъулӀэу фэдищкӀэ нахьыбэ ашӀыщт.
[caption id="attachment_137758" align="aligncenter" width="800"] Сурэтыр: АКъУ[/caption]
Ӏоныгъом и 1-м къыщегъэжьагъэу Адыгэ къэралыгъо университетым хэхьэрэ Мыекъопэ къэралыгъо гуманитарнэ-техническэ колледжым гурыт профессиональнэ гъэсэныгъэ кластерэу «Адыгэ Республикэм зекӀонымкӀэ ыкӀи ащ епхыгъэ фэӀо-фашӀэхэмкӀэ гъэсэныгъэ гупч» зыфиӀорэм ӀофшӀэныр щыригъэжьэщт, ар федеральнэ проектэу «Профессионалитетым» къыдыхэлъытагъэу щыт. Мыгъэ нэбгырэ 331-рэ рагъэджэщтмэ, 2025-рэ илъэсым ахэм япчъагъэ фэдищ къыхэхъощт.
Гъэсэныгъэ кластерэу «Адыгэ Республикэм зекӀонымкӀэ ыкӀи ащ епхыгъэ фэӀо-фашӀэхэмкӀэ гъэсэныгъэ гупчэм» Ӏофэу ыгъэцэкӀэщтым ипрограммэ зэхэзгъэуцуагъэхэр ыкӀи къэзгъэлъэгъуагъэхэр УФ-м гъэсэныгъэмкӀэ и Министерствэрэ профессиональнэ гъэсэныгъэм хэхъоныгъэ егъэшIыгъэнымкIэ Институтымрэ, ар онлайн-шӀыкӀэм тетэу шышъхьэӀум и 9-м экспертнэ сессием къыхалъхьэгъагъ. Проектым игъэцэкӀэн пэӀуагъэхьанэу федеральнэ бюджетым сомэ миллион 70-рэ къытӀупщыгъ. А ахъщэмкӀэ 2023-рэ илъэсым ыкӀэхэм анэс гъэсэныгъэ площадкэхэр агъэцэкӀэжьыщтых, хэушъхьафыкӀыгъэ Ӏэмэ-псымэхэр къащэфыщтых.
Кластерым гъэсэныгъэ организациитфырэ гурыт ыкӀи бизнес цӀыкӀум епхыгъэ хъызмэтшӀэпӀэ 14-рэ хэхьагъэх. АКъУ-м и Мыекъопэ къэралыгъо гуманитарнэ-техническэ колледж ары гъэсэныгъэ площадкэхэр зыщагъэпсыщтхэр. Ахэм студентхэри кластерым къыхиубытэрэ хъызмэтшӀапӀэмэ яӀофышӀэхэри ащеджэнхэ алъэкӀыщт. Экокурортэу «Лагъонакъэр» зэхэщэн ӀофхэмкӀэ ӀэпыӀэгъу къафэхъущт.
«Мы гъэсэныгъэ кластерым ишӀуагъэкӀэ Адыгэ Республикэм иэкономикэ хэхъоныгъэ егъэшӀыгъэным фэӀорышӀэрэ зекӀо отраслэм зыкъыӀэтыщт. ӀэпэӀэсэныгъэшхо зыхэлъыщт кадрэхэм ягъэхьазырын ащ щыдэлэжьэщтых, ащ ифэӀо-фашӀэхэм, хъызмэтшӀапӀэу къешӀэкӀыгъэхэм ящыкӀэгъэ ӀофышӀэхэр агъотынхэм фэшӀ непэрэ мафэм щыӀэ хъугъэ программакӀэхэр агъэфедэх», — къыхигъэщыгъ АКъУ-м иректорэу Мамый Даутэ.
Гъэсэныгъэ кластерым ӀофыгъуакӀэу хагъэхьагъэхэм ащыщ кадрэу агъэхьазырыщтхэр кавказ хьэкӀэ егъэблэгъэным ихабзэхэм зэращагъэгъозэщтхэр. Шъолъырым изекӀо индустрие мэхьанэшхо щыраты лъэпкъ туризмэм. Егъэджэнхэр лъэныкъуибгъоу гощыгъэщтых, зекӀоным епхыгъэ фэӀо-фашӀэхэр зэкӀэ къыхиубытэщтых.
Адыгэ къэралыгъо университетым ипресс-къулыкъу