Бюджет чIыпIэхэр джыри щыIэх
Мы мафэхэм Адыгэ къэралыгъо университетымрэ Мыекъопэ къэралыгъо технологическэ университетымрэ бюджет мылъкукIэ еджэщтхэм япчъагъэ хагъэхъоным фэшI тхылъхэр аштэх.
Адыгэ къэралыгъо университетым лъэныкъо 13-кIэ бюджет чIыпIэ тедзэхэр иIэх. Очнэ шIыкIэм тетэу хьисапымкIэ ыкIи информатикэмкIэ кIэлэегъаджэ, IT гъэсэныгъэм епхыгъэ лъэныкъохэмкIэ, программированиемкIэ, фундаментальнэ физикэмкIэ, биологиемкIэ ыкIи нэмыкIхэмкIэ бюджет чIыпIэхэр джыри щыIэх. Джащ фэдэу кIэлэегъэджэ сэнэхьат зыщарагъэгъотырэми тхылъхэр аштэх. ХимиемкIэ ыкIи биологиемкIэ, пэублэ гъэсэныгъэмкIэ ыкIи урысыбзэмрэ литературэмрэкIэ, пэублэ гъэсэныгъэмкIэ ыкIи хьисапымрэ информатикэмрэкIэ, психологиемкIэ, педагогикэмкIэ ыкIи нэмыкI лъэныкъохэмкIэ сэнэхьат зэзыгъэгъоты зышIоигъохэм ятхылъхэр ащ рахьылIэнхэ алъэкIыщт. Филологиемрэ культурэмрэкIэ факультетым джащ фэдэу «Литературнэ IофышI, художественнэ литературэр зэдзэкIыжьыгъэныр» зыфиIорэм бюджет чIыпIэхэр иIэх.
Заочнэ шIыкIэм тетэу «Отечественная филология» зыфиIорэм чIэхьанхэм фэшI джыри тхылъхэр аштэх. Мы апшъэрэ еджапIэм экономикэмкIэ ифакультет имагистратурэ программэу «Управление в сфере образования» зыфиIорэмкIи тхылъхэр арахьылIэнхэ алъэкIыщт.
Мыхэри зэнэкъокъу шIыкIэм тетэу макIох, апшъэрэ еджапIэм ушэтын щызытыжьыщтхэр шышъхьэIум и 20-м нэс, зыкI къэралыгъо ушэтынымкIэ чIахьэ зышIоигъохэр шышъхьэIум и 25-м нэс екIолIэнхэ фае.
Адыгэ къэралыгъо университетым чIэхьагъэхэр шышъхьэIум и 26-м къэнэфэщтых. ШышъхьэIум и 29-м унашъор ашIыщт.
Мыекъопэ къэралыгъо технологическэ университетми тхылъхэм яштэн мы мафэхэм аублагъ, шышъхьэIум и 24-м — ушэтынхэр апшъэрэ еджапIэм щызытыжьыгъэхэм ыкIи шышъхьэIум и 25-м ушэтынхэр зымытыжьыщтхэм тхылъхэм яштэн тедзэ аухыщт. ШышъхьэIум и 26-м пхырыкIыгъэхэр къэнэфэщтых, и 28-м сыхьатыр 12-м нэс тхылъхэм яоригиналхэр мы апшъэрэ еджапIэм къырахьылIэнхэ е онлайн шIыкIэм тетэу къыхахын фае. ШышъхьэIум и 29-м чIэхьагъэхэр къэнэфэщтых.
Приемнэ комиссием иIофшIэн шапхъэу пылъхэр зэхъокIыгъэхэп, тхылъхэм яштэн шъхьаIэ фэдэу баллхэмкIэ зэнэкъокъур къэнэжьы, фэгъэкIотэнхэр зиIэхэр къыхахых, гъэхъагъэ зиIэ ныбжьыкIэхэм балл тедзэхэр афашIых.
ДЕЛЭКЪО Анет.