Мыгъэ Кавказ заповедникым щызэхащэгъэгъэ экспедицием Саратовскэ къэралыгъо университетым географиемкIэ ифакультет истудент-экологхэр хэлэжьагъэх.

[caption id="attachment_137733" align="aligncenter" width="800"] Сурэтыр: Кавказ заповедникыр[/caption]

Ахэм пшъэрылъэу зыфагъэуцужьыгъагъэр агъэцэкIагъ, пэсэрэ зэманым къыщегъэжьагъэу цIыфхэм ашIыщтыгъэ псэупIэхэр, Iошъхьэжъхэр, ацангуархэр къагъотыгъэх.

«АцангуаркIэ» заджэхэрэр мыжъо такъырхэм ахашIыкIыщтыгъэ къэшIыхьэгъэ псэуалъэхэр, анахьэу чэупкъхэр ары.

[caption id="attachment_137734" align="aligncenter" width="800"] Сурэтыр: Кавказ заповедникыр[/caption]

Экспедицием хэтхэм къалэу Шъачэ пэмычыжьэ чIыпIэхэр къакIухьагъэх. Кордонэу «Умпырь» зыфиIорэм иIэгъо-блэгъу ижъырэ Iуашъхьэхэр къыщагъотыгъэх, ахэм конусым итеплъэ джыри угу къагъэкIы. Мы чIыпIэм Кавказым икъушъхьэтх шъхьаIэрэ псыхъоу Лабэрэ унэгу къыщыкIэуцох.

Геолог ныбжьыкIэхэм зэмыжэгъэхэ иероглифхэри апэ къифагъэх, ахэм мыжъо пIуакIэхэм ахэупкIыгъэхэу псэушъхьэ, цIыф, мэз сурэтхэр атетых. Ижъ-ижъыжьым къыщегъэжьагъэу гурыт лIэшIэгъухэм анэс ахэр хаутыгъагъэхэу специалистхэм къаIо.

Студентхэм япэщагъэу, физическэ географиемрэ ландшафтнэ экологиемрэкIэ кафедрэм иIофышIэу Юрий Волковым экспедицием иIофшIэн заухым къыIуагъ:

— ЗэкIэми апэ экспедицием къыщыдгъотыгъэ пкъыгъохэр дгъэкъэбзэнхэшъ, Iоф адэтшIэнэу щыт. Тэ Кавказ заповедникым ичIыопс комплексхэм афэшъхьафэу тарихъ-культурнэ кIэным исаугъэтхэмкIи зэрэбаир тшIошъ хъугъэ. Дунэе культурнэ кIэныр къэзыгъэгъунэрэ ЮНЕСКО-м ишапхъэхэм къэтлъэгъугъэхэри къэдгъотыгъэ пкъыгъохэри зэрадиштэхэрэм тыришыхьат.

Шъаукъо Аслъангуащ.