Фыщт екIурэ гъогум техьагъэх
Адыгеим и ЛIышъхьэу КъумпIыл Мурат игукъэкIкIэ илъэс къэс зэхащэрэ ныбжьыкIэ зэхахьэу «Фыщт-2023» зыфиIорэр неущ рагъажьэ ыкIи шышъхьэIум и 20-м нэс кIощт. Мыгъэ ар ятфэнэрэу зэхащэ.
[caption id="attachment_137703" align="aligncenter" width="800"] Сурэтыр: А. Гусев. Сурэтыр: А. Гусев.[/caption]
Хабзэ зэрэхъугъэу, Адыгеим имызакъоу, Къэбэртэе-Бэлъкъарым, Къэрэщэе-Щэрджэсым, Къалмыкъым, Краснодар краим къарыкIыгъэ сэнаущыгъэ зыхэлъ ныбжьыкIэхэр мы Iофтхьабзэм зэрипхыщтых. ЗэкIэмкIи мыгъэ ащ нэбгырэ 350-рэ фэдиз хэлажьэ.
Мы Iофтхьабзэр зэхэщэгъэныр 2017-рэ илъэсым апэу зыгу къэкIыгъэр республикэм ипащ ары. Сэнаущыгъэ зыхэлъ ныбжьыкIэ чанхэр зэрэзэрэугъоихэрэм, Iофтхьабзэм пащэхэр хэлажьэхэу, зэдэгущыIэгъухэр зэрэзэдыряIэхэрэм шIогъэшхо къызэритырэр къыдилъытэзэ, нэужым ар лъыгъэкIотэгъэным кIэщакIо фэхъугъ.
Iофтхьабзэм къыдыхэлъытагъэу КъумпIыл Мурат ныбжьыкIэхэм шъхьэихыгъэ зэдэгущыIэгъу адыреIэ. Шъолъыр зэфэшъхьафхэм къарыкIыгъэ лIыкIохэр зыгъэгумэкIырэ упчIэхэмкIэ республикэм ипащэ зыкъыфагъазэ, гукъэкI гъэшIэгъонэу яIэхэмкIэ АР-м и ЛIышъхьэ къыдэгуащэх.
— НыбжьыкIэ политикэр нахьышIоу зэхэщэгъэнымкIэ предложениехэр къытIэкIэхьанхэм, республикэм игъэцэкIэкIо хэбзэ къулыкъухэм яIофшIэн зэрагъэпсырэм ахэм уасэу фашIырэр тшIэным тэркIэ мэхьанэшхо иI. НыбжьыкIэхэм язэхахьэу «Фыщт» зыфиIорэм илъэс къэс кIэу къыхэтхырэр макIэп. А гухэлъхэм ащыщыбэр щыIэныгъэм щыпхырытщыгъ, адрэхэр джырэ уахътэм тэгъэцакIэх. КъыткIэхъухьэрэ лIэужхэм къаIэтырэ Iофыгъохэми язэшIохын тишъыпкъэу тыпылъыщт. НыбжьыкIэ чанэу гукъэкIхэр зиIэхэм апае тишъолъыр щызэшIотхырэр бэ. ШIэныгъэ дэгъу зыIэкIэлъэу, гукъэкI гъэшIэгъонхэр зиIэхэр, зицыхьэ зытелъыжьхэу, зиIоф хэшIыкI фызиIэхэр тищыкIагъэх. Гъэсэныгъэ дэгъу агъотыным, ясэнэхьат гъэхъагъэхэр щашIынхэм апае тэ тфэлъэкIыщтыр зэкIэ тэшIэ. ТилъэкI зэхэлъэу ныбжьыкIэ сэнаущхэм ягукъэкIхэр агъэцэкIэнэу амал яттыным мэхьанэшхо иI. НыбжьыкIэ зэхахьэу «Фыщт» зыфиIорэр ащ тегъэпсыхьагъ. Мы Iофыгъом зызэриушъомбгъурэр ыкIи къотэгъухэр нахьыбэу иIэ зэрэхъурэр сигуапэ, — къыхигъэщыгъ КъумпIыл Мурат.
Республикэм ипащэ къызэриIуагъэмкIэ, я 5-рэ зэхахьэм ипрограммэ гъэшIэгъоныбэ къыхэхьагъ. НыбжьыкIэхэр спортым, зекIоным, культурэм, гъэсэныгъэм, нэмыкI лъэныкъохэм япхыгъэ Iофтхьабзэхэм ахэлэжьэнхэ алъэкIыщт. Джащ фэдэу Адыгеим ичIыопс идэхагъэ зэрагъэлъэгъун, шIэныгъэу аIэкIэлъхэмкIэ зэдэгощэнхэ амал яIэщт.
Ыпэрэ илъэсхэм афэдэу ар гъэшIэгъонэу, шIуагъэ къытэу регъэкIокIыгъэныр зэхэщакIохэм пшъэрылъ шъхьаIэу зыфагъэуцужьы. Ар зэшIохыгъэ зэрэхъущтым щэч хэлъэп.