Къалэу Мыекъуапэ и Мафэ ихэгъэунэфыкIынкIэ народнэ депутат­хэм я Совет унашъо ышIыгъ мы илъэсым Iоныгъом и 2-м ар рагъэкIокIынэу. Iоныгъом и 1-м ыкIи и 2-м Iофтхьабзэхэр зэхащэ­щтых.

ЧIыпIэхэри а Iофтхьабзэхэм ялъытыгъэу агъэнэфагъэх. Егъэ­джэкIо-гъэсакIохэм япарад щы­Iэщт, спортымкIэ зэнэкъокъущтых, творческэ коллективхэм якъэгъэлъэгъонхэр щыIэщтых.

Къалэу Мыекъуапэ иадминистрацие ипащэу Геннадий Митрофановым ыпэкIэ къызэрэ­хигъэщыгъагъэмкIэ, мы Iофтхьа­бзэхэм анахь шъхьаIэхэм ащы­­щыщт зэш Соловьевхэм ацIэкIэ щыт шIухьафтыныр зэра­ратыщтыр. Ащ нэмыкIэу къэгъэ­лъэгъонхэр, мастер-классхэр ыкIи мэшIоустхъу дахэр цIыфхэм зэрагъэлъэгъун амал яIэщт.

Адыгеим икъэлэ шъхьаIэ и Ма­фэ ихэгъэунэфыкIын цIыфхэм анаIэ зытырадзэн, ашIогъэшIэгъонэу хъун зылъэкIыщт Iоф­тхьэбзабэ къыделъытэ.

Iоныгъом и 1-м «IэпэIасэхэм якъалэ» зэрагъэлъэгъун алъэ­кIыщт: IэпэIасэхэм яIэшIэгъэ гъэшIэгъонхэм якъэгъэлъэгъонрэ ящэнрэ ащ къыхеубытэ. ЯIоф­шIагъэхэр нэбгыри 100 фэдизмэ мыщ къыщагъэлъэгъон алъэ­кIыщт. Херсон хэкум иIэпэIасэхэр апэрэу а къэгъэлъэгъоным хэлэжьэщтых.

Iоныгъом и 1-м урамэу Краснооктябрьскэм (культурэм икъэ­лэ унэу «Гигантым» къыщыублагъэу къэлэ паркым нэсэу) пчэдыжьым сыхьатыр 10-м къы­щегъэжьагъэу пчыхьэм сы­хьатыр 6-м нэс къэгъэлъэгъонхэр щыкIощтых.