Къыблэ шъолъыр лъыхъокIо-къэгъэнэжьэкIо отрядым (ЮРПСО) икъулыкъушIэхэр чэщ-мэфищым къыкIоцI Рос­тов хэкум къикIыгъэ зекIо нэбгыритIумэ алъыхъугъэх.

ШышъхьэIум и 5-м ятэрэ ыкъорэ Мыекъуапэ икIыхи ТхьачIышхо бгыр къызэпачызэ псэу­пIэу Гъэ­хъунэ Плъыжьым ылъэныкъокIэ кIуагъэх. ЗекIохэм шышъхьэIум и 11-м къагъэзэжьын фэягъ. Ау якъэбар щымыIэ зэ­хъум шышъхьэIум и 13-м ахэм яIахьылхэм къэгъэ­нэжьакIохэм зафагъэзагъ.

ЮРПСО-м ипресс-къулыкъу къызэритыгъэмкIэ, непэ, шышъхьэIум и 16-м, Адыгеим икъушъхьэ­хэм ащыкIодыгъэ зекIохэр яIахьыл бзылъфыгъэм телефонымкIэ къыфытеохи, зыдэщыIэхэр къыра­Iуагъ. Ахэр «Бзерпинскэ карнизкIэ» заджэхэрэм пэгъунэгъугъэх. ЯпсауныгъэкIэ зыпари гумэкIыгъо щыIэп, шъобжхэр ателъэп.

— Къыблэ шъолъыр лъыхъокIо-къэгъэнэжьэкIо отрядым икъулыкъушIэ илъэс 60 зыныбжь хъулъфыгъэм зыфытеом къыриIуагъ ошъуапщэу щыIагъэм къыхэкIэу зэпырыкIыпIэу «Чертовы ворота» зыфаIорэм дэжь ахэр зэ­рэщыгъощагъэхэр. Нэ­ужым зекIохэр Солонцовэ къу­шъхьэтхым екIолIагъэх, ащ ыуж псыхъоу КIышъэ инэпкъ ехыгъэх. Нэужым «Сеннэ ПолянэкIэ» за­джэ­хэрэр зэпачи, къушъхьэт­хэу Аспиднэм екIугъэх, нэужым псыхъоу Уруштен екIолIагъэх, — къеты ЮРПСО-м ипресс-къу­лыкъу.

ЗекIохэм къызэраIуа­гъэмкIэ, вертолетыр къызалъэгъум, аIэхэр къаIэтыхэзэ зарагъэлъэгъуным пылъыгъэх, ау гу къалъа­тэным пае машIо кIагъэ­нэнэу агу къэкIыгъэп.

Хъулъфыгъэхэм зэра­лъыхъухэрэр къызашIэм, лъэшэу ашIогъэшIэгъо­ныгъ. Ахэм IэпыIэгъу ямы­щыкIагъэу Гъэхъунэ Плъыжьым ежь-ежьырэу екIолIэжьынхэу щытыгъэх.