Адыгэ къэралыгъо университетым цифрэ технологие­хэмкIэ ыкIи шIэныгъэ хэхыгъэхэмкIэ и Институт исту­дентэу Емыж Ислъам хэушъхьафыкIыгъэ стипендием икъыдэхынкIэ программэм щатекIуагъ, ар сэнаущыгъэ зыхэлъ сту­дентхэм 2023 — 2024-рэ илъэсхэм афы­зэхащэ.

[caption id="attachment_137659" align="aligncenter" width="800"] Сурэтыр: АКъУ.[/caption]

Урысыем иапшъэрэ еджэ­пIэ 29-мэ студент 200 къащахахыгъ.

Къэралыгъо 30-мэ, Урысыем, Беларусым, Китаим, Индием ащеджэрэ студент мин 13 программэм хэлэжьэнхэу лъэIу тхылъхэр къатыгъэх. Апэрэ ушэтынхэм апшъэрэ еджэпIи 150-мэ ащеджэрэ студентхэр хэлэжьагъэх.

Программэм ифинал ихьагъэхэр зэкIэмэ анахь баллыбэ изыгъэкъугъэхэр ары: ушэтынхэмкIэ, ящыIэныгъэ гъогу фэгъэхьыгъэ тхылъхэмкIэ, экспертмэ адашIыгъэ зэдэгущыIэгъу­хэмкIэ. СтипендиехэмкIэ программэм иэкспертнэ совет хэхьагъэх топ-менеджерхэр, IофышIэхэр, ИТ-индустрием ипредпринимательхэр, шIэныгъэ, гъэсэныгъэ ыкIи общест­веннэ организациехэм ялIыкIохэр.

Емыж Ислъам АКъУ-м хьисапымрэ компьютернэ шIэныгъэхэмрэкIэ ифакультет ияплIэнэрэ курс щеджэ. Университетым икомандэ хэтэу программированиемкIэ (ICPC) ар дунаим и Чемпионат хэлэжьэгъагъ, гъэсэныгъэ гупчэу «Сириус» зыфи­Iорэм и «ШэкIогъу мазэм ихьисап программэ» икIэлэегъаджэу Iоф щишIагъ, «Хьисап гъатхэр» зыфиIорэ семинарэу сэнаущыгъэ зыхэлъ сабыймэ афызэха­щагъэу къалэу Новосибирскэ щы­кIуагъэм кIэлэегъа­джэу рагъэблэгъэгъагъ. Джащ фэдэу Ислъам «DANO» зы­фиIорэ лъэпкъ олимпиадэм иапэрэ едзыгъо осэшIэу хэтыгъ, непэ­рэ комбинатори­кэмкIэ ыкIи джэгун теориемкIэ еджапIэу Мыекъуапэ щы­Iагъэм, гъэмэфэ хьисап еджапIэу «Алгебра и геометрия» зы­фиIоу Суздаль щызэ­хащагъэм, ятIонэрэ гъэмэфэ хьисап еджапIэу алгебрэм ыкIи пчъагъэхэм ятеорие афэгъэхьыгъэу Вороново щырагъэкIокIыгъэм ыкIи нэмыкIыбэм ахэлэжьагъ.

Стипендиер зыфагъэуцугъэхэм мазэ къэс сомэ мин 25-рэ къаратыщт, ау ащ изакъоп, яIофшIэн гъэхъагъэхэр щашIынхэмкIэ ыкIи ыпэкIэ лъыкIотэнхэмкIэ къадэIэпыIэщтых.

Адыгэ къэралыгъо университетым ипресс-къулыкъу