Уихэгъэгу къулыкъу фэпхьыныр, къэуухъумэныр ыкIи шIу плъэгъу­ныр зэкIэми япшъэрылъ. ДзэкIолIхэр — тинепэрэ лIыхъужъых, ахэр мамырныгъэм изехьакIох ыкIи тикъэралыгъо ищынэгъончъагъэ иухъумакIох.

[caption id="attachment_137655" align="aligncenter" width="800"] Унагъом ихъарзынэщ.[/caption]

«Ихэгъэгу къыухъумэныр хъулъфыгъэ пэпчъ ипшъэры­лъэу сэлъытэ», — еIо Щ. Амэрбый.

Амэрбый гурыт еджапIэр къызеухым, Адыгэ къэралыгъо университетым и Мыекъопэ къэралыгъо гуманитар-техни­ческэ колледж псэолъэшIынымкIэ ифакультет чIэхьагъ ыкIи 2017-рэ илъэсым къыухыгъ. А илъэс дэдэм къулыкъум ащагъ, илъэсрэ ащ къэтыгъэу къыгурыIуагъ ищыIэныгъэ дзэ къулыкъум рипхы зэрэшIоигъор. 2018-рэ илъэсым зэзэгъыныгъэ шIыкIэм тетэу дзэм хэхьэ ыкIи непэ къызнэсыгъэм Мыекъуапэ идзэ частьхэм ащыщ хэтэу къулыкъур ехьы. Ащ щыIэзэ хэушъхьафыкIыгъэ дзэ операцием хэлэжьэнэу рихъухьагъ ыкIи зы мафи ыгу джэнджэш къихьагъэп гъогоу хихыгъэмкIэ.

Амэрбый къызэриIуагъэмкIэ, дзэ къулыкъушIэхэм пшъэрылъ шъхьаIэу яIэр яхэгъэгу къаухъу­мэныр, зыщыщхэм, зыфэдэ цIыф лъэпкъхэм ямылъытыгъэу, мамыр цIыфхэр къагъэгъунэнхэр ары. ДзэкIолI ныбжьыкIэм зэри­лъытэрэмкIэ, къиныгъохэм зы­парэкIи къагъэщтагъэп, уипсау­ны­гъэ къыхьымэ, къулыкъур пхьын фаеу елъытэ.

— Зэзэгъыныгъэ шIыкIэм тетэу къулыкъур пхьыным фэшI сыда анахь шэн шъхьа­Iэу пхэлъын фаер?

— Гу кIуачIэ уиIэн, пшъэры­лъэу къагъэуцугъэм изэшIохын угукIи пшъхьэкIи уфэхьазырын фае. Ащ нэмыкIэу, къиным зыкъебгъэгъащтэ хъущтэп, — еIо дзэкIолI ныбжьыкIэм.

Амэрбый къулыкъур зыдихьырэ дзэкIолIхэм афэраз.

— ХэушъхьафыкIыгъэ дзэ операцием сызыхэлажьэрэм къыщыублагъэу кIалэхэмкIэ зэныбджэгъу шъыпкъэ тызэ­фэхъугъ, дэгъоу тызэгурэIо ыкIи сыд фэдэрэ лъэныкъокIи Iэпы­Iэгъу тызэфэхъужьы, — еIо ащ.

ЛIыблэнагъэ къызхигъафэзэ ихэгъэгу къызэриухъумагъэм фэшI Ш. Амэрбый Суворовым имедаль ыкIи «За Воинскую Доблесть» зыфиIорэр къыфа­гъэшъошагъэх.

ЯкIалэ гъогоу хихыгъэм ным­рэ-тымрэ дырагъаштэ, лIыблэнагъэу хэлъым рэгушхох ыкIи хэткIи ар щысэтехыпIэ хъунэу мэгугъэх.

ТичIыпIэгъухэм ацIэкIэ Амэр­бый ыкIи мамырныгъэм фэ­бэнэрэ дзэкIолIэу игъусэхэм тафэлъаIо псаухэу, узынчъэхэу яунагъохэм къагъэзэжьынэу, мамыр щыIакIэр зэтырагъэуцожьынэу.

КIАРЭ Фатим.