ШъолъырыкIэхэм, зэрэхэгъэгоу егъэпшагъэмэ, «Единэ Россием» пэрытныгъэр ащиIыгъ, ар Iэнэ хъураеу «ШъолъырыкIэхэр хэгъэгум политическэу хэгъэгъозэжьыгъэнхэр: 2023-рэ илъэсым ихэдзынхэм зафэгъэхьазырыгъэныр» зыфиIорэм къыщиIуагъ политическэ ушэтынхэмкIэ Департаментым (ВЦИОМ-м) ипащэу Михаил Мамоновым.

«ДНР-р пштэмэ, «Единэ Россием» зымакъэ фэзытынэу щы­фэхьазырыр — процент 83-рэ. ЛНР-р а шапхъэхэм афэдизыщт, гурытымкIэ «Единэ Россием» дезыгъэштэщтхэр процент 73-м къыщегъэжьагъэу 80-м нэс. За­порожскэ хэкур ары зэкIэмэ анахьыбэ зымакъэхэр «Единэ Россием» фэзытынхэу зыщы­фэхьазырхэр — процент 80-м къыщегъэжьагъэу 89-м нэс. Херсонскэ хэкум — процент 68-м къыщежьэ, 80-м щыкIахьэ. Мыщ фэдэ пчъагъэхэр къыз­хэкIыхэрэм ащыщ партием Iоф­шIэнышхо мы шъолъырхэм зэращигъэцакIэрэр, ар цIыфмэ янэрылъэгъу хъугъэ», — къыхигъэщыгъ ащ.

Шъугу къэдгъэкIыжьын, «Еди­нэ Россием» шъолъырыкIэхэм конференциехэр ащызэхища­гъэх ыкIи Хэбзэгъэуцу ЗэIукIэхэмрэ чIыпIэ хэбзэ органхэмрэ ащыхадзыщтхэм якандидатурэхэр къащигъэлъэгъуагъэх. Ахэм янахьыбэр партием илIыкIох, ныбжьыкIэхэр, анахьэу предпри­нимательхэр, кIэлэегъаджэхэр, медицинэм иIофышIэхэр, хэу­шъхьафыкIыгъэ дзэ операцием хэлэжьагъэхэр, общественник­хэр ахэтых.

Хэдзынхэм я ЗыкI мафэ хэ­дзэкIо кампание 78-рэ рагъэ­кIокIыщт. Мандат мин 34-рэ зэблахъущт. Депутатхэр шъо­лъыр ыкIи чIыпIэ къулыкъухэм ащыхадзыщтых — Хэбзэгъэуцу зэIукIэ 20-мэ, субъектмэ якъэлэ шъхьаIэмэ якъэлэ думэ 16-мэ, джащ фэдэу чIыпIэ зыгъэ­IорышIэжьыпIэ къулыкъухэм ахэтыщтхэр. Шъолъыр 25-мэ губернаторхэр ащыхадзыщтых, Хабаровскэ — къалэм имэр.