Адыгэ Республикэм и Правительствэ и Унэ Адыгеим и ЛIышъхьэу КъумпIыл Мурат IофшIэгъу зэIукIэгъу непэ щыдыриIагъ Урысые Къэралыгъо телерадиокомпанием игенеральнэ пащэ игуадзэу Рифат Сабитовым.

Ащ къэралыгъо телерадиоком­паниеу «Адыгеим» ипэщакIэу Пхъэшх Ащэмэз республикэм и ЛIышъхьэ нэIуасэ фишIыгъ. Мы зэIукIэгъум щыIагъэх АР-м ими­нистрэхэм я Кабинет и Тхьаматэ игуадзэу ЛIыхэсэ Махьмуд, АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Къонэ Заур, Адыгэ Республикэм лъэпкъ IофхэмкIэ, IэкIыб къэрал­хэм ащыпсэурэ тилъэпкъэгъу­хэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, Урысые Къэралыгъо телерадиокомпанием ишъолъыр департамент ипащэ игуадзэу Андрей Никитиныр.

АР-м и ЛIышъхьэ къызэрэхигъэщыгъэмкIэ, республикэм ихэбзэ къулыкъухэмрэ Адыгеим щыIэ къутамэмрэ зэгурыIоныгъэ­зэдэлэжьэныгъэ азыфагу илъ, республикэм щыпсэухэрэм къэ­бар тэрэзыр игъом икъоу алъы­гъэIэсыгъэнымкIэ тапэкIи язэ­дэ­лэжьэныгъэ гъэпытэгъэным мэ­хьанэшхо зэриIэр ащ къы­Iуагъ.

Урысыем и Къэралыгъо теле­радиокомпание ипащэхэм ялIыкIоу шъолъырхэм ятелерадиокомпаниехэм яIофшIэн фэгъэзагъэм къызэрэхигъэщыгъэмкIэ, УФ-м и Президентэу Владимир Путиным къыгъэуцугъэ пшъэ­рылъхэм атетэу гушъхьэлэжь шэпхъэ анахь инхэм атегъэпсы­хьэгъэ хабзэхэр гъэпытэгъэнхэм, цIыф лъэпкъ зэфэшъхьаф­хэу Урысыем щыпсэухэрэм абзэрэ якультурэрэ къызэте­гъэнэжьыгъэнхэм Урысые медиахолдингым лъэшэу ынаIэ тырегъэты.

Шъолъырхэм яжурналистхэм яIофшIэн нахь дэгъоу зэхэщагъэ зэрэхъущтым, гупшысакIэхэр пхырыщыгъэнхэм япхыгъэ проектыкIэхэм язэшIохын илъэныкъо гъэнэфагъэхэм ахэр ате­гущыIагъэх. Анахьэу анаIэ зытырагъэтыгъэхэм ахэплъытэн плъэкIыщт шъолъыр зырызхэм ялъэпкъыбзэкIэ радиокъэтынхэр зэрэзэхащэхэрэр.

КъумпIыл Мурат къызэриIуа­гъэмкIэ, къэтынхэр нахь дэгъоу зэхэщэгъэнхэмкIэ республикэм Iофышхо щызэшIуахы. СэнэхьатхэмкIэ зэнэкъокъунхэм пае джащ фэдэу амалышIухэр арагъэгъотых. Гъэзетхэм къары­хьэрэ ыкIи телевидениемрэ ра­диомрэкIэ къатырэ материал анахь дэгъухэр къызIэкIэкIыгъэ журналистхэм ыкIи автор куп­хэм республикэм и ЛIышъхьэ ишIухьафтын илъэс къэс афагъэшъуашэ.

Республикэм къихъухьэрэ хъугъэ-шIагъэхэр тэрэзэу ыкIи икъоу къэтыгъэнхэмкIэ шIыкIэ-­амалхэр къэгъотыгъэнхэм мэхьанэшхо зэриIэм, ныдэлъфы­бзэр къэухъумэгъэнымкIэ ыкIи хэхъоныгъэ егъэшIыгъэнымкIэ, социальнэ мэхьанэ зиIэ проект­хэр пхырыщыгъэнхэмкIэ пшъэ­рылъхэм зэшIохыкIэу афэхъущт­хэм зэдягупшысэнхэ фае.

Къэралыгъо телерадиоком­паниеу «Адыгеим» ипэщакIэ хэгъэгум ипащэ къыгъэуцугъэ пшъэрылъ пстэухэмкIи респуб­ликэм ихэбзэ къулыкъухэм шIуагъэ къэзытыщт зэдэлэжьэныгъэ адыриIэным ынаIэ зэрэтыригъэтыщтыр, ащ зэрэфэхьазырыр къыIуагъ.

Илъэс 42-рэ зыныбжь ­Пхъэшх Ащэмэз къалэу Черкесскэ къы­щыхъугъ, телерадиокомпаниеу «Адыгеим» пащэ фашIыфэ нэс журналистэу Iоф ышIагъ, къэралыгъо телерадиокомпаниеу «Къэрэщэе-Щэрджэсым» къэбархэмкIэ ипрограммэхэр зэрищагъэх, Урысые Къэралыгъо телерадиокомпанием икъутамэу «Къэрэщэе-Щэрджэсым» ипащэ игодзагъ, къэралыгъо телерадиокомпаниеу «Ставропольем» къэбархэмкIэ икъулыкъу ипащэ игодзагъ. Общест­веннэ IофшIэнхэр ыгъэцакIэщтыгъэх, Урысые политическэ партиеу «Единэ Россием» ыцIэ­­кIэ муниципальнэ лIыкIо къулыкъухэм ахадзэу къыхэ­кIыгъ.

АР-м и ЛIышъхьэ ипресс-къулыкъу