Электрон терминалхэр зыгъэфедэхэрэм къахэхъо
Адыгеим иобщественнэ транспортэу электрон терминалхэр зыгъэфедэхэрэр илъэсныкъом къыкIоцI процент 20-кIэ нахьыбэ хъугъэ.
Апэрэ илъэсныкъом ащ фэдэ пкъыгъохэр маршруткэ 36-мэ арагъэуцуагъ.
ПстэумкIи республикэм щызекIорэ общественнэ транспортым ипроцент 43-мэ е, нэмыкIэу къэпIон хъумэ, автобус, троллейбус 209-мэ джыдэдэм электрон терминалхэр къащызфагъэфедэх.
Урысыем и Банк икъутамэ — Адыгеим и Лъэпкъ банк ипресс-къулыкъу къызэритыгъэмкIэ, ахъщэ Iэрылъхьэ зыщамытырэ общественнэ транспортыр нахьыбэрэмкIэ зыщызекIорэр Мыекъуапэ, Тэхъутэмыкъое, Теуцожь районхэр ары. Илъэсэу итыр имыкIызэ Мыекъуапэ щызекIорэ автобус заулэмэ джыри терминалхэр арагъэуцонэу рахъухьэ.
Адыгэ Республикэм и Правительствэ, Адыгэ Республикэм и Лъэпкъ банк, цIыфхэр зезыщэрэ компаниехэм ягъусэхэу мы проектыр пхыращы.
«Электрон терминалхэм яшIуагъэкIэ зекIуапкIэр такъикъ заулэкIэ общественнэ транспортым щаты. Ар цIыфхэмкIэ Iэрыфэгъоу щыт, ахъщэ Iэрылъхьэ къыздырахьакIынэу ищыкIагъэп. КарточкэкIэ зекIуапкIэр зэратырэм цIыфхэм яфедэ хэлъ, банкхэм якэшбэк е ябонусхэр ахэм къаIокIэх, — къыIуагъ Урысыем и Банк икъутамэ — Адыгеим и
Лъэпкъ банк ипащэ игуадзэу Александр Путинцевым. — Ащ нэмыкIэу республикэм щызекIорэ маршруткэ 70-мэ QR-кодкIэ зекIуапкIэр щаIахы».