Зы щагурэ джэгупIэрэ агъэпсыгъэх
Лъэпкъ проектэу «ПсэупIэр ыкIи къэлэ щыIакIэр» зыфиIорэм ишIуагъэкIэ Джэджэ районым ичIыпIитIумэ гъэпсын ыкIи гъэкIэжьын IофшIэнхэр ащыкIуагъэх.
Станицэу Джаджэм иурамэу Международнэм тет унэу N 20-м ищагу къызэлъиубытырэ чIыпIэм зэрэщытэу асфальт тыралъ-хьагъ.
— Щагум изэтегъэпсыхьан унэм чIэсхэм яшIоигъоныгъэхэр къащыдалъытагъ. Ахэм заIудгъакIи, ящагу зыфэдэ хъунэу зыфаехэмкIэ тяупчIыгъ, нэужым IофшIэнхэр агъэцэкIагъэх, — еIо Джэджэ къоджэ псэупIэм ипащэу
Сергей Ботвинновым.
Ащ фэшъхьафэу станицэм Дондуковскэм дэт скверэу Кировым ыцIэ зыхьырэм сабый цIыкIухэм апае кIэлэцIыкIу джэгупIэ щагъэпсыгъ.
Дондуковскэ чIыпIэ псэупIэм иадминистрацие иIофышIэу Юлия Котовам къызэриIуагъэмкIэ, джэгупIэр культурэм и Унэ пэблагъ. КIэлэцIыкIухэр ащ щыгушIукIыгъэх, янэ-ятэхэм ягуапэу ахэр площадкэм къащэх. Зыщагъэнэфэгъэ уахътэм ехъулIэу IофшIэнхэр къаухыгъэх, цIыфхэр псэолъэшIхэм афэразэх.
ИшIогъэшхо къэкIо
Лъэпкъ проектэу «ЗекIоныр ыкIи хьакIэпэгъокIыным ииндустрие» зыфиIорэм ишIогъэшхо къызэрэкIорэр щыIэныгъэм къыгъэлъэгъуагъ.
Адыгэ Республикэм зекIонымрэ зыгъэпсэфыпIэхэмрэкIэ и Комитет макъэ къызэригъэIугъэмкIэ, лъэпкъ проектым ишIуагъэкIэ къушъхьэ экокурортэу «Лэгъонакъэ» щыщ чIыналъэу «Верхняя деревня» зыфиIорэм ишIын рагъэжьэщт. КъызэраIуагъэмкIэ, ащ чIыгу гектар 60-м ехъу зэлъиубытыщт.
2025 – 2026-рэ илъэсхэм мыщ хьакIэщ зэхэтхэу 4 щашIыщт, Ахэм номер 690-рэ къадыхэлъытэгъэщт. ЗыгъэпсэфакIохэр къушъхьэхэм къызэрячъэхыщт гъогу километрэ 25-рэ зекIохэр лъэгапIэхэм адэзыщэещтхэ гъогуи 4 агъэпсыщт.
Хабзэм иIэпыIэгъукIэ курортым иинфраструктурэ зэтырагъэпсыхьащт, псырыкIуапIэхэм якъещэлIэн апэ рагъэ-шъыщт.