Адыгэ Республикэм и ЛIышъхьэу КъумпIыл Мурат ныбжьыкIэхэр игъусэхэу шышъхьэIум и 18-м къушъхьэу Фыщт ылъапэ екIолIэщтых.Мы илъэсым слетыр ятфэ­нэрэу кIощт, Урысыем ишъо­лъыри 5-мэ къарыкIыгъэ нэбгырэ 350-м ехъу ащ хэлэжьэщт.

Адыгеим, Къэбэртэе-Бэлъ­къарым, Къэрэщэе-Щэрджэсым, Къалмыкъым, Краснодар краим къарыкIыщт ныбжьыкIэхэу сэнаущыгъэ зыхэлъхэр Кавказ биосфернэ заповедникым къыхиубытэрэ чIыпIэу зекIохэм афытегъэпсыхьэгъэ шъхьэегъэзыпIэу «Фыщтым», гъогушхо къызэпачынышъ, нэсыщтых. Ятфэнэрэ слетым пае гъэкIэжьыгъэ программэ агъэ­хьазырыгъ. Мыщ хэлэжьэщтхэм спорт зекIоным, гъэсэныгъэм, культурэм япхыгъэ Iофтхьабзэу зэрахьащтхэм яIахь ахашIы­хьащт, Адыгеим ичIыопс дахэ зэрагъэлъэгъущт, шIэныгъэу ыкIи опытэу яIэмкIэ зэхъожьыщтых, нахьыжъхэр упчIэжьэгъу ашIыщтых. Слетым ипрограммэ бэ зэфэшъхьафэу къыдилъы­тэрэр. Шыхэм атесхэу къакIу­хьащт, Фыщт имылылъэ чIыпIэ нэсыщтых, ГТО-м ишапхъэхэр атыщтых, щэбзащэмкIэ ощтых, волейболымкIэ, биатлонымкIэ ыкIи нэмыкIхэмкIэ зэнэкъокъущтых. Ащ нэфэшъхьафэу гъэсэныгъэм епхыгъэ Iофтхьабзэ­хэри зэшIуахыщтых, документальнэ ыкIи патриотическэ фильмхэм яплъыщтых, лекциехэм ядэIущтых. Ащ нэмыкIэу слетэу «Фыщтым» хэлажьэхэрэм адыгэ джэгоу зэхащэщтым къыщышъонхэ, Iэпэщысэхэм яшIынкIэ мастер-классым яIэпэIэсэныгъэ къыщагъэлъэгъон амал яIэщт, творческэ Iофтхьабзэхэри зэхащэщтых.

Слетым хэлажьэхэрэмкIэ анахь мэхьанэшхо зиIэщтыр АР-м и ЛIышъхьэу КъумпIыл Мурат ныбжьыкIэхэм зэIукIэ-гъоу адыриIэщтыр ары. Iофы-гъоу зыгъэгумэкIыхэрэмкIэ джэуапхэр ащ аритыжьыщтых, джащ фэдэу кIэщакIо зыфэхъу­хэрэ Iофтхьабзэхэм еплъыкIэу афыриIэмкIи адэгощэщт.