Урысыем и Почтэ иреспубликэ къутамэхэм къэралыгъо фэIо-фэшIэ зэфэшъхьафыбэ аIэ къырагъэхьаным иамал яIэ хъугъэ.

ПсэупIэ 20-мэ адэсхэм ащ къытырэ амалхэр къызфагъэфедэх, мы илъэсым джыри республикэм ипочтэ къутэмэ 12-мэ ахэр къаIэкIэхьащтых.

Почтэ зэпхыныгъэхэмкIэ Урысые Федерацием и ГъэIорышIапIэу Адыгэ Республикэм щыIэм къызэритыгъэмкIэ, къэралыгъо фэIо-фашIэхэм япхыгъэ IофыгъохэмкIэ гъэмэфэ мазэхэм нахь упчIабэ яIагъ. Красногвардейскэ районымкIэ къуаджэу Адэмыерэ Теу­цожь районымкIэ къуаджэу Аскъэлаерэ анахьыбэу упчIэхэр къыздикIыгъэхэр.

Порталым исервисхэр къызфагъэфедэнхэм пае паспортымрэ СНИЛС-мрэ ищыкIагъэхэр. Зызэрэрагъэтхыгъэм фэгъэхьыгъэ къэбарыр телефонымкIэ къаIэкIэхьажьыщт. Ащ нэмыкIэу почтэм иреспубликэ къутэми 8-мэ хэушъхьафыкIыгъэ компьютерыр къызфагъэфедэзэ сайтэу «Работа.ру» зыфиIорэм ихьанхэ алъэкIыщт. Мы илъэсым почтэ къутэми 4-мэ ащ фэдэ амал джыри яIэ хъущт.

Анахьэу Къэралыгъо фэIо-фашIэхэм япортал кIэлэеджакIохэмрэ абитуриентхэмрэ ары дэгъоу къызфэз­гъэфедэнхэ зылъэкIыщтыр, анахьэу «Пушкинская карта» зыфиIорэр агъэ­псын зыхъукIэ ыкIи апшъэрэ еджапIэхэм ачIэхьанхэм ыпэкIэ. Джащ фэдэу интернет-ресурсымкIэ хэбзэ­Iахьхэр птын, узыфэе врачым дэжь зябгъэтхын, транспортыкIэм епхыгъэ тхылъхэр зэкIэ зэрищыкIагъэм тетэу бгъэпсын, шIуагъэ зыпылъ нэ-мыкI фэIо-фашIэхэр зэшIопхын плъэ­кIыщт.

Урысыем и Почтэ иамалыкIэхэр щыIэ хъунхэмкIэ зишIуагъэ къэкIуагъэр Урысыем и Президентэу Вла­димир Путиным пшъэрылъ зэрафи­шIыгъэм ыкIи партиеу «Единэ Рос­сием» ащ къызэрэдыригъэштагъэм ялъытыгъэу къоджэ почтэ къутамэхэм ягъэкIэжьын ипрограммэ гъэцэкIагъэ зэрэхъугъэр ары.

Шъугу къэтэгъэкIыжьы: Адыгэ Рес­публикэм почтэ къутэми 137-рэ иI, а пчъагъэм щыщэу 110-р къуаджэхэм адэт.