Фондым иIофышIэхэр рагъэджагъэх
Къэралыгъо фондэу «Хэгъэгум иухъумакIохэр» зыфиIорэм иIофышIэхэр Мыекъопэ къэралыгъо технологическэ университетым щырагъэджагъэх, производствэм фэсакъыгъэным ар фэгъэхьыгъагъ.
Фондым иIофышIэхэм афэшъхьафэу апшъэрэ еджапIэм щырагъэджагъэх социальнэ ухъумэнымкIэ ыкIи IофшIэнымкIэ Гупчэм, IофшIэныр ягъэгъотыгъэнымкIэ Гупчэм, МФЦ-м, Дзэ комиссариатым, социальнэ ыкIи пенсие ухъумэнхэмкIэ Фондхэм, психоневрологическэ диспансерым ыкIи щыIэныгъэм хэгъэгъозэжьыгъэнхэмкIэ медицинэ гупчэм ялIыкIохэр.
МКъТУ-м ифедеральнэ инновационнэ площадкэу «LeanSkills.lab» зыфиIорэм егъэджэнхэр щыкIуагъэх. Фондым ипшъэрылъхэр гъэцэкIэгъэнхэм, производствэм фэсакъыгъэным алъэныкъокIэ зэрэзекIонхэ фаехэр ары еджакIохэр зыфагъэсагъэхэр.
Шъугу къэдгъэкIыжьын, Урысыем и Президентэу Владимир Путиным иунашъокIэ фондыр зэхащагъ. ХэушъхьафыкIыгъэ дзэ операцием хэлэжьагъэхэм, хэкIодагъэхэм яунагъохэм, уIагъэу атещагъэ хъугъэхэм арылIыкIыгъэхэм яIахьылхэм IэпыIэгъу ягъэкIыгъэныр ары фондым ипшъэрылъыр. IэпыIэгъоу щыIэхэр зэкIэ ахэм ягъэгъотыгъэным фондыр фэIорышIэ: медицинэ ыкIи социальнэ IэпыIэгъур, Iэзэгъу уцхэр къафэщэфыгъэнхэр, санаторнэ-курортнэ IэзапIэхэм гъэкIогъэнхэр, ветеранхэр IофшIапIэхэм аIугъэхьэгъэнхэр ыкIи нэмыкIхэр.
2018-рэ илъэсым къыщыублагъэу МКъТУ-м пилотнэ проектэу «Бережливое правительство» зыцIэр егъэцакIэ, ар апшъэрэ еджапIэм ипрограммэу «Фабрика процессов» зыфиIорэм хэхьэ. УрысыемкIэ апэрэу университетым апшъэрэ гъэсэныгъэ системэм проектыр хигъэхьагъ — «Бережливый вуз — МГТУ» ащ зэреджагъэхэр. 2020-рэ илъэсым УФ-м шIэныгъэмрэ гъэсэныгъэмрэкIэ и Министерствэ МКъТУ-м статусэу «Федеральнэ инновационнэ площадкэкIэ» зэджагъэхэр къыфигъэшъошагъ. Ащ елъытыгъэу гъэсэныгъэ ыкIи инновационнэ проектэу «Инновационные образовательные технологии развития бережливых компетенций современного инженера (LeanSkills.Lab)» зыфиIорэр илъэси 5-м къыкIоцI егъэцакIэ. А уахътэм мыщ щырагъэджа-гъэх шъолъырым игъэIорышIапIэмэ якъулыкъушIэхэр ыкIи промышленнэ хъызмэтшIапIэмэ яIофышIэхэр. Проектым ипащэр Къэралыгъо корпорациеу «Росатомыр» ары, ащ МКъТУ-м мы лъэныкъомкIэ хэхъоныгъэхэр зэришIыгъэхэр мызэу, мытIоу хигъэунэфыкIыгъ.
Университетым икIэлэегъаджэхэмрэ истудентхэмрэ къэралыгъо фондым иIофшIэн хэлэжьэщтых, ахэм волонтер Iофыр ары агъэцэкIэщтыр, «Хэгъэгум иухъумакIохэр» зыфиIорэ къэралыгъо фондым ипроектхэм защагъэчанын гухэлъ яI.
Мыекъопэ къэралыгъо технологическэ университетым ипресс-къулыкъу.