Бырсыр Тимур псэолъэшI ныбжьыкIэу мы лъэныкъом илъэс заулэ хъугъэу щылажьэхэрэм ащыщ. «DREAM DEVELOPMENT» ыцIэр ар зипэщэ хъызмэтшIапIэм.

Ар псэолъэшI унагъо къихъухьагъ. Ятэшэу Бырсыр Бислъан Урысыем иза­служеннэ псэолъэшI, Санкт-Петербург щэпсэу, ащ пэрытныгъэ щызыIыгъ компаниеу «Строительный трест» зыфиIорэм ипэщэгъу. Ащ икIалэу Анзори ятэ игъогу техьажьыгъ, илъэсыбэ хъугъэу мы лъэныкъом хэт.

— Сшынахьыжъэу Анзор псэолъэшIыным сыхэзыщагъэр, хъызмэтшIапIэм кIэщакIо фэхъугъэр, — къыIуагъ Тимур псэолъэшIым и Мафэ ипэгъокIэу гущыIэгъу тызыфэхъум. Къуаджэу Кощхьаблэ къыщыхъугъ, щапIугъ. Ащ дэт гурыт еджапIэр къызеухым Краснодар дэт мэкъумэщ университетым экономикэм, хэбзэIахьхэм япхыгъэ сэнэхьат щызэригъэгъотыгъ. Автомобильхэм яфэIо-фашIэхэр зыщагъэцакIэхэрэ Гупчэм 2012-рэ илъэсым иIофшIэн щыригъэжьэгъагъ.

ПсэолъэшIыныр ошIэ-дэмышIэу ищыIэныгъэ къыхэхьагъ. 2019-рэ илъэсым псэолъэшI хъызмэтшIапIэ ыгъэпсынэу ышнахьыжъ предложение къызехьым, ныбжьи ар къыIэкIэмыхьащтэу ыкIи ыужи имыхьащтэу ыIогъагъ.

Арэу щытми, лъэхъаным диштэрэ цIэ гъэшIэгъон зиIэ хъызмэтшIапIэр Тимур зэхищэн ылъэкIыгъ.

— Шъыпкъэу пIощтмэ, хъызмэтшIапIэм пэщэныгъэр дызесхьанэу, псэолъэ цIыкIоу щымытхэу, къатыбэу зэтет унэ­шхо­хэр едгъэжьэнхэу сшынахьыжъ къызысеIом апэрэ уахътэм сыкъэщтэгъагъ. Ау «Iоф мыублэм блэ хэс» адыгэхэм зэраIоу, зетэгъажьэхэм зэпстэур къызыпыуцуагъ.

ХъызмэтшIапIэм ыцIэ зэрямышIыкIэм фэдэу апэрэ унэу рагъэжьагъэхэри псэукIэ амалэу къатыщтхэмкIэ нэмыкI­хэм атекIых. Псыхъоу Шъхьэгуащэ инэпкъэу Мыекъуапэ иIэхэм ащыщ зы­ща­гъэуцухэрэр.

Ахэр зыщашIыщтхэ чIыпIэу къыхахыгъэр къызэрыкIуагъэп, тхылъхэм ягъэ­хьазырын Iофыбэ къыпыкIыгъ. Джащ фэдэу псыхъо нэпкъым пэблагъэу зэрагъэуцущтхэм фэшI, унэхэм алъапсэ ишIыни иныгъ. А зэпстэумэ гумэкIыгъуабэ къызэрарыкIыгъэр шъхьэихыгъэу къеIо Тимур, ау ащ пае къызэкIэкIон ыдагъэп. НыбжьыкIэ нахь мышIэми, мэхагъэ къызхэбгъэфэнышъ, ебгъэжьэгъэ Iофыр гъогу ныкъом щычIэудзыжьыныр мытэрэзэу елъытэ. Ащ фэдэ пытагъэм къыкIэкIуагъэр лъэхъаным диштэу гъэпсыгъэ унэ дахэу псыхъо нэпкъым къыIууцуагъэхэр ары.

— Сятэшыр, сшынахьыжъ сиупчIэжьэгъух. Ахэм ямызакъоу, сишъэогъоу, мы лъэныкъомкIэ сэнэхьат зэригъэгъотыгъэу, иIофшIэн шIу ылъэгъоу, профессионализмэгъэ ин зыхэлъ Тхьаркъохъо Ринат псэолъэшIынымкIэ пащэу сигъус. Ахэм гушхуагъэ къысхалъхьэ, — еIо Тимур.

Иныбджэгъу ыкIи иIофшIэгъу Ринат нэIуасэ тызыфешIым, унэхэм гъэпсыкIэу яIэр, псыIушъом зэрэIутхэм иягъэ къэмыкIоным пай шIыкIэу агъэфедагъэхэр, къэлэшхохэм непэ ащашIырэ унэхэм зыпарэкIи атемыкIэу шIыгъэнхэм фэшI къыдалъытагъэхэр къысфаIотагъ. КIэлитIум якъэгущыIакIэ Iофэу зыпылъхэр шIу дэдэ зэралъэгъурэр, апэрэ псэуа­лъэу агъэуцухэрэм агуи апси зэрахалъхьэрэр къыхэщыгъ.

Тимур псэолъэшIыным хэшIыкI фызиIэ цIыфхэр къыготхэмэ ащ зыригъэзэгъэу къызэтемыуцоу, чэщи мафи Iоф зыдешIэжьы, мы лъэныкъом кIэу къыхахьэрэр къызIэкIигъэхьаным, хэукъоныгъэхэр химышIыхьанхэм пылъ.

— КъызэрэчIэщыгъэмкIэ, мы Iоф­шIэныр сэсый, гухахъо хэсэгъуатэ, джары къыздэхъугъэр, — къыIуагъ ащ. —ЦIыфхэм щыIэкIэшIу зыщыряIэщт псэупIэ дахэхэр пшIынхэр насыпыгъ. ИлъэсипшI пчъагъэхэм къалэр къагъэдахэу, ачIэсхэр агъэгушIохэу щытыщтых. Ахэр о зэрэ­пшIыгъэхэм урымыгушхон плъэкIыщтэп.

Тимур шъэуитIу иI. Ахэри мы хъызмэтым хэщагъэ хъунхэу фай, яцIыкIугъом къыщыублагъэу шIу аригъэлъэгъуным ыуж итыщтэу къыхегъэщы. Ятэш Бырсыр Бислъан псэолъэшIыным гъэхъэгъэ инхэр щишIынхэмкIэ пстэумэ апэу зишIуагъэ къэкIуагъэр псэуалъэу ышIыхэрэр зыгъэфедэщтхэм агу рихьыным, Iэрыфэгъу афэхъуным афэшI ищыкIагъэхэм зыпарэкIи адэмыхэу зэригъэ­уцухэрэр ары. ИкIалэу Анзори ащ фигъэсагъ.

Тимури апэрэ мафэхэм къащыублагъэу а гъогум тырищагъ. Арышъ, псэ­олъэшI унагъо къызэрэхэкIыгъэр къыгъэ­шъыпкъэжьыныр, ятэшым зытырищэгъэ шапхъэхэм атемыкIыныр ежьыркIэ шIокI зимыIэ Iоф.

ПсэолъэшIым и Мафэу неущ хагъэунэфыкIыщтымкIэ Бырсыр Тимури, игупсэу мы лъэныкъом хэтхэми тафэгушIо, ягу­хэлъхэр къадэхъунхэу тафэлъаIо!

ХЪУТ Нэфсэт.

Сурэтхэр: Бырсыр Тимур ихъарзынэщ, Iэшъынэ Аслъан.