Адыгеим игъэхъагъэхэм гупчэм гу къалъитагъ
Адыгеим и ЛIышъхьэу КъумпIыл Мурат республикэм и Правительствэ зычIэт унэм непэ УФ-м и Къэралыгъо Думэ аграр IофыгъохэмкIэ и Комитет и Тхьаматэ иапэрэ гуадзэу Владимир Плотниковым щыIукIагъ.
ЗэIукIэгъум хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэрэщэ Анзаур, АР-м иминистрэхэм я Кабинет и Тхьаматэ игуадзэу ЛIыхэсэ Махьмуд, АР-м мэкъу-мэщымкIэ иминистрэу Къуанэ Анзаур, Адыгеим ифермерхэм я Союз ипащэу Дзэхъохъу Аслъан.
ЗэIукIэгъум зэрэщыхагъэунэфыкIыгъэмкIэ, Урысыем имэкъумэщышIэ (фермер) хъызмэтшIапIэхэмрэ имэкъумэщ кооперативхэмрэ я Ассоциацие ипрезидентэу Владимир Плотниковыр республикэм ифермерхэм зэхэсыгъоу адыряIэщтым хэлэжьэщт. Фермерхэм, мэкъумэщ кооперацием, мэкъумэщышIэ-фермер хъызмэтшIапIэхэм къэралыгъо IэпыIэгъу ягъэгъотыгъэным епхыгъэ Iофыгъуабэм мыщ щатегущыIэнхэу рахъухьэ. Адыгеим и ЛIышъхьэ Урысыем имэкъумэщышIэ (фермер) хъызмэтшIапIэхэмрэ имэкъумэщ кооперативхэмрэ я Ассоциацие ипащэ республикэм къызэрэкIуагъэмкIэ зэрэфэразэр риIуагъ. Республикэм ичIыгулэжьхэм шъолъырым гъомылапхъэхэр щафикъунхэм яIахьышIу зэрэхашIыхьэрэр, IофшIэпIэ чIыпIэхэр зэрэзэхащэхэрэр, гъомылэпхъэ дэгъу къызэрахьыжьырэр ащ хигъэунэфыкIыгъ.
«Хэгъэгум имэкъу-мэщ щылажьэхэрэм яфитыныгъэхэм яухъумакIоу, ахэм яфедэхэр къэралыгъо лъэгапIэм къыщызыгъэлъагъоу ары тэ о узэрэтшIэрэр. Республикэм непэ мэкъу-мэщым ылъэныкъокIэ гъэхъэгъэшIухэр ышIыгъэх. Ар бэкIэ зишIуагъэр лъэпкъ проектхэмрэ федеральнэ программэхэмрэ. IофшIэнми, къуаджэм исоциальнэ лъэныкъуи гъэхъэгъэшхохэр щышIыгъэнхэм ахэр фэIорышIагъэх», — къыIуагъ КъумпIыл Мурат.
Владимир Плотниковым къызэрэхигъэщыгъэмкIэ, Адыгеим имэкъу-мэщкIэ гъэхъагъэу яIэхэм федеральнэ гупчэми гу къалъитагъ. Урысыем мэкъу-мэщымкIэ и Министерствэ аужырэ коллегиеу иIагъэм ар анахьэу къыщылъэгъуагъ.
«Адыгеим имэкъу-мэщ щылажьэхэрэм ятекIоныгъэхэм федеральнэ хэбзэ къулыкъухэр атегущыIагъэх. Къуаджэхэм социальнэ, инфраструктурэ псэуалъэхэр ащыгъэпсыгъэнхэмкIэ хэбзэ къулыкъухэм Iофышхо ашIагъ. Республикэм икъуаджэхэм адэсхэм ягумэкIыгъохэр игъорыгъозэ зэрэзэшIуахырэр тэлъэгъу, «адыгэ къуаер» республикэм зэриер агуригъэIон ылъэкIыгъ, кадрэ ныбжьыкIэхэм ягъэхьазырын епхыгъэ Iофыгъохэр зэшIуахых», — къыIуагъ Владимир Плотниковым.
АР-м и Къэралыгъо Совет — Хасэм и Тхьаматэу Владимир Нарожнэм зэIукIэгъум зэрэщыхигъэунэфыкIыгъэмкIэ, федеральнэ IэпыIэгъум ишIуагъэкIэ непэ мэкъумэщышIэ хъызмэтшIапIэхэм, лэжьэныр езыгъэжьэгъэкIэ фермерхэм къэралыгъо IэпыIэгъу ягъэгъотыгъэнымкIэ ищыкIэгъэ амалхэр Адыгеим зэрехьэх, къоджэдэсхэм ясоциальнэ Iофыгъуабэм ягъэцэкIэн ыуж ит.
Республикэм и ЛIышъхьэ Владимир Плотниковым «тхьауегъэпсэу» риIуагъ Адыгеим къызэрэкIуагъэм, мэкъумэщышIэхэм яфэныкъоныгъэхэм ынаIэ къызэратыригъэтырэм афэшI.
Шъугу къэтэгъэкIыжьы мэкъумэщышIэ хъызмэтшIэпIэ мин 1,1-м ехъу республикэм зэрэщызэхэщагъэр, Адыгеим къыщахьыжьырэ гъомылапхъэм ипроцент 30-р ахэм къазэраIэкIэкIырэр. Мы аужырэ илъэси 3-м республикэм имэкъу-мэщ щылажьэхэрэм сомэ миллион 880-рэ хъурэ къэралыгъо IэпыIэгъу аратыгъ.
МэкъумэщышIэ-фермер хъызмэтшIапIэхэр ары лэжьыгъэхэмрэ дагъэ зыхашIыкIырэ культурэхэм япроцент 50-м ехъур, мэлхэмрэ пчэнхэмрэ япроцент 27-р, чэтхэм япроцент 20-р, былым пIашъэхэм япроцент 17-р къэзыхьыжьыгъэхэр. Къуаджэхэм зэдиштэу хэхъоныгъэ ягъэшIыгъэным телъытэгъэ къэралыгъо программэм тетэу 2021-рэ илъэсым къыщегъэжьагъэу 2023-рэ илъэсым нэс сомэ миллиарди 4,3-рэ Адыгеим къыфыхагъэкIыгъ. Социальнэ, инфраструктурэ псэолъэ 80-м ехъу атыгъ, псэолъэ 23-мэ яшIын джыдэдэм ыуж итых. IофшIэпIэ чIыпIэ мин 1,7-м ехъу зэхащагъ, псырыкIопIэ, газрыкIопIэ, электроэнергиерыкIопIэ зэраIэкIагъахьэрэр километрипшI пчъагъэ агъэпсыгъ, специалист ныбжьыкIэхэм псэукIэ амалэу яIэхэр нахьышIу афашIыгъ. Адыгеим и ЛIышъхьэ пшъэрылъ зэрафишIыгъэм тетэу былым пIашъэхэр аIыгъынхэм пае грантхэр зэратыгъэхэм мылъкоу яIоф халъхьащтыр процент 20-м нэсэу къырагъэIыхыгъ.
АР-м и ЛIышъхьэ ипресс-къулыкъу