Адыгэ Республикэм и Лъэпкъ музей «ЛIыхъужъхэм яшъхьэгъусэ­хэр» зыфиIорэ фотоальбомым илъэтегъэуцо непэ щыкIуагъ. Республикэм и ЛIышъхьэу КъумпIыл Мурат дзэ къулыкъушIэхэм янэхэмрэ яшъхьэгъусэхэмрэ аIукIагъ.

«Адыгэ Республикэм и ЛIыхъужъхэм яшъхьэгъусэхэр» зыфиIорэ фотоальбомхэр мыщ щаратыжьыгъэх, дзэ къулыкъушIэхэм, ахэм яунагъохэм IэпыIэгъоу аратыщтым, общественнэ патри­отическэ движениехэм зызэрарагъэ­ушъом­бгъущтым атегущыIагъэх.

Джащ фэдэу Iофтхьабзэм хэлэжьа­гъэх Урысыем и ЛIыхъужъэу, АР-м и Къэралыгъо Совет — Хасэм и Тхьаматэ игуадзэу Цэй Эдуард, АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, фондэу «Хэгъэгум иухъума­кIохэр» зыфиIорэм икъутамэ ипащэу ПIатIыкъо Аслъан, АР-м ибзылъфыгъэхэм я Союз итхьаматэу Ворэкъо Хьалимэт, Хэгъэгум идзэкIолIхэм яунагъохэм я Комитет ишъолъыр къутамэ итхьаматэу Ольга Пронтенкэр.

Адыгеим и ЛIышъхьэ проектэу «ЛIы­хъужъхэм яшъхьэгъусэхэр» зыфиIорэм республикэр хэлэжьэным тапэкIэ къыды­ригъэштэгъагъ. Ащ къыдыхэлъытагъэу сурэтхэм якъэгъэлъэгъон республикэм къыщызэIуахыгъагъ, проектэу «ЛIыхъужъ­хэм яшъхьэгъусэхэр» зыфиIорэм кIэщакIо фэхъугъэ Екатерина Колотовкинам, хэ­ушъхьафыкIыгъэ дзэ операцием хэла­жьэхэрэм яшъхьэгъусэхэм аIукIэгъагъэх.

Проектым къыдыхэлъытагъэу дзэ къулыкъушIэхэм янэхэм, яшъхьэгъусэхэм, якIэлэцIыкIухэм апае фотосессиехэр щыIагъэх. «Адыгэ Республикэм и ЛIыхъужъхэм яшъхьэгъусэхэр» зыфиIорэ фотоальбомыр агъэхьазырыгъах. Респуб­ликэм и ЛIышъхьэ икIэщакIоу ар къыдагъэкIыгъ. Адыгеим щыщ бзылъфыгъэ 40-мэ ясурэтхэр альбомым дэхьагъэх. ХэушъхьафыкIыгъэ дзэ операцием хэлэжьэрэ яшъхьэгъусэхэм ядзэ шъуашэ­хэр ащыгъэу ахэм сурэт зытырырагъэ­хыгъ. Сурэт пэпчъ яшъхьэгъусэхэм афэкIорэ тхыгъэ бзылъфыгъэхэм рагъэ­гъусагъ. ПстэумкIи альбом 55-рэ къыдагъэкIыгъ. Ахэм ащыщхэр АР-м и Лъэпкъ музей, республикэ тхылъеджапIэхэм, фондэу «Хэгъэгум иухъумакIо­хэр» зыфиIорэм икъутамэ аратыгъэх. Проектым хэлэжьэрэ бзылъфыгъэ пэпчъ непэ фотоальбом къыратыгъ.

Дзэ къулыкъушIэхэм агу къэзыIэтырэ, зэрэ обществэу зэкъозыгъэуцорэ ащ фэдэ патриотическэ Iофтхьабзэхэм, проектхэм мэхьанэшхо зэряIэр КъумпIыл Мурат хигъэунэфыкIыгъ.

«Тибзылъфыгъэхэр яшъхьэ­гъусэхэм зэрафэшъыпкъэхэм, дзэкIолIэу заом щыфэхыгъэхэм янэхэмрэ яшъхьэгъусэхэмрэ гукIочIэшхо зэряIэм ятамыгъэу щыт мы альбомыр. ТичIыпIэгъухэу фэхыгъэхэм лIыхъужъныгъэу зэрахьагъэр егъашIи тщыгъупшэщтэп. Шъори, тилIыхъужъхэм яшъхьэгъусэхэми янэхэми «тхьашъуе­гъэпсэу» шъосэIо пытагъэрэ щэIагъэрэ къызэрэзыхэжъугъафэрэм, шъуихъулъфыгъэхэм къотэгъу шъузэрафэхъурэм афэшI. Фронтым непэ Iут кIалэхэм тицыхьэ ателъ.

Ахэм къарыкIощтым шъощ фэдэу тэри тегъэгумэкIы. ТекIоныгъэр къыдахы­гъэу ахэм псын­кIэу ядэжь къагъэзэ­жьы­нэу тыфай», — къы­Iуагъ КъумпIыл Мурат.

Дзэ къулыкъушIэхэм социальнэ IэпыIэгъу ягъэгъотыгъэным, яIэзэгъэным япхыгъэ Iофыгъо­хэми атегущыIагъэх. Адыгеим и ЛIышъхьэ зэрэхигъэунэфыкIыгъэмкIэ, хэбзэ къулыкъухэм ре­нэу тичIыпIэгъухэр зыдэщыIэ дзэ частьхэм зэпхыныгъэ адыряI, ящыкIэгъэ техникэр, Iэшэ- шъуашэхэр, Iэзэгъу уцхэр, гъомылапхъэхэр аIэкIагъахьэх. Дзэ къулыкъушIэхэм яунагъохэм фэгъэкIотэныгъэ зэфэшъхьафхэр яIэх, финанс, юридическэ Iэпы­Iэгъу ахэм арагъэгъоты. IофшIапIэм икъэгъотынкIэ, яунэгъо Iофхэм язэшIохынкIэ яшIуагъэ арагъэкIы. Къэралыгъо фондэу «Хэгъэгум иухъумакIохэр» зы­фи­Iом икъутамэ мэкъуогъум къыщегъэжьагъэу мыщ фэдэ IофхэмкIэ егъэгъуазэх. Нэбгырэ 400 фэдизмэ къэралыгъо фондым зыкъыфагъэзэгъах.

«ТидзэкIолIхэр озэофэхэ ахэм яунагъохэмрэ, ягупсэхэмрэ тафэгумэкIыныр типшъэрылъ. Мы лъэныкъом лъэшэу гъунэ лъытэфы. ДзэкIолIхэм ягупсэхэм зыкъызэрэтфагъэзэрэ Iофыгъохэр зэкIэ зэшIохыгъэнхэм тегъэпсыхьа­гъэу тиIофшIэн зэхэтэщэ», — къыIуагъ КъумпIыл Мурат.

Адыгэ Республикэм ибзылъфыгъэхэм я Союзрэ Хэгъэгум идзэкIолIхэм яунагъохэм я Ко­митет иреспубликэ къутамэрэ мы Iофым яIахь къызэ­рэхашIы­хьэрэр республикэм и ЛIышъхьэ шъхьафэу къыхигъэщыгъ. ШIушIэ IэпыIэгъум зе­гъэушъомбгъугъэнымкIэ фондэу «Хэгъэгум иухъу­макIохэр» зыфиIорэр, общественнэ объе­динениехэр IэпыIэгъу къафэ­хъухэзэ, кIуачIэу яIэр зэкIэ рахьылIэзэ Iоф ашIэнэу КъумпIыл Мурат пшъэрылъ афишIыгъ.

ХэушъхьафыкIыгъэ дзэ опера­цием хэлажьэхэрэм яшъхьэгъу­сэхэм ацIэкIэ общественнэ организациехэм ялIыкIохэм респуб­ликэм и ЛIышъхьэ зэрэфэразэ­хэр къаIуагъ дзэ къулыкъушIэ­хэмрэ ахэм яунагъохэмрэ яфэ­ныкъоныгъэхэр ягъэгъотыгъэным фытегъэпсыхьэгъэ проектхэу Ады­геим щагъэцакIэхэрэмкIэ Iэпы­Iэгъу къазэрафэхъурэм фэшI.

«Хэбзэ къулыкъухэм, общественникхэм, волонтерхэм зэдэлэжьэныгъэу адытиIэр тапэкIи дгъэлъэшыщт. ТидзэкIолI­хэм ящыкIагъэхэр къыдэтлъытэзэ, шIушIэ IэпыIэгъур тыугъоищт, хэушъхьафыкIыгъэ дзэ операцием хэлажьэхэ­рэм яунагъохэм яIофыгъохэр зэкIэ зэшIотхыщтых», — къыIуагъ КъумпIыл Мурат.

Адыгэ Республикэм и ЛIышъхьэ ипресс-къулыкъу Сурэтхэр: А. Гусев.