Курсхэр зэхащэх
Апэрэ IэпыIэгъу зэрарагъэгъотыщт шIыкIэм ыпкIэ хэмылъэу зыщыфагъэсэщтхэ курсхэр Адыгеим щызэхащэх.
ХэушъхьафыкIыгъэ дзэ операцием иветеранхэм ащыщ а Iофтхьабзэм кIэщакIо фэхъугъэр. Фондэу «Хэгъэгум иухъумакIохэр» зыфиIорэм икъутамэ хэтхэм ащ къыдырагъэштагъ.
Ахэм макъэ къызэрагъэIугъэмкIэ, лъыр акIэкIы зыхъукIэ е яакъыл зыщыокIэ апэрэ IэпыIэгъоу аратын фаер блэкIыгъэ зыгъэпсэфыгъо мафэхэм къарагъэлъэгъугъ. Клубэу «Вертикаль» зыфиIорэм къекIуалIэхэрэмрэ АКъУ-м иабитуриентхэмрэ ары Iофтхьабзэхэм ахэлэжьагъэхэр.
— ХэушъхьафыкIыгъэ дзэ операцием иветеранрэ опыт зиIэ конструкторымрэ ащ фэдэ егъэджэнхэр зэхащэщтых. Шэмбэт къэс патриотическэ, ныбжьыкIэ организациехэм ахэтхэм, хэушъхьафыкIыгъэ дзэ операцием хэлажьэхэрэм, ащ иветеранхэм, зышIоигъо пстэуми чIыпIэ къин ифагъэм апэрэ IэпыIэгъу зэребгъэгъотыщт шIыкIэм зыфагъэсэн алъэкIыщт, — къеты фондым икъутамэ ипресс-къулыкъу.