Адыгеим ипрокуратурэ загъэпсыгъэр блэкIыгъэ лIэшIэгъум икъихьагъур ары. 1922-рэ илъэсым шышъхьэIум и 10-м Пшызэ-хы ШIуцIэ шъолъыр Къэлэ гъэцэкIэкIо комитетым иунашъокIэ прокуратурэм икъулыкъухэр Черкес (Адыгэ) хэку исполкомым иотделэу агъэпсыгъ.

ПрокурорхэмкIэ анахь къинэу щытыгъэр Хэгъэгу зэошхом илъэхъан ары. Прокуратурэм иIофышIэхэм ащыщыбэхэм Iашэр ашти, яхэгъэгу къаухъумэнэу Дзэ Плъы­жьым ыкIи партизанхэм яотрядхэм ахэтхэу заом хэлэжьагъэх.

1943-рэ илъэсым, пыим зыпэуцужьыхэ нэуж, Адыгэ хэку прокурорым партизан отрядыр игъусэу къыгъэзэжьи, ипшъэрылъхэм ягъэцэкIэн ыуж ихьажьыгъ.

ЛIэшIэгъум ехъугъэу Адыгеим ипрокуратурэ иIофы­шIэхэр хабзэм фэлажьэх, цIыфхэм яфитыныгъэхэр къау­хъумэх, рэхьатныгъэр республикэм илъыным фэIорышIэх.

2022-рэ илъэсым къыщегъэжьагъэу джырэ уахътэм нэс Адыгеим ипрокуратурэ пэщэныгъэ дызэрахьагъ ыкIи непи чанэу Iоф щашIэ опытышхо зыIэкIэлъ, зисэнэхьат хэшIыкIышхо фызиIэ прокурорхэм.

КъулыкъушIэхэм япшъэрылъхэр зэрифэшъуашэу агъэ­цэкIэнхэмкIэ, шIуагъэ къытэу IофшIэныр зэшIуахынымкIэ амалышIухэр аIэкIэлъых. Прокурорхэм яIофшIэнкIэ анахь шъхьаIэр зекIокIэ-шIыкIэ тэрэз ахэлъыныр, ренэу яшIэныгъэхэм ахагъэхъоныр, япшъэрылъхэм язэшIохынкIэ шIыкIакIэу щыIэхэр къызфагъэфедэнхэр ары.

Адыгэ Республикэм ипрокуратурэ иIофышIэхэм шъып­къагъэ, гуетыныгъэ ыкIи IэпэIэсэныгъэ ин ахэлъэу япшъэ­рылъхэр зэрагъэцакIэрэм фэшI инэу сафэраз.

Анахьэу тиветеран лъапIэхэм шъхьэкIэфэныгъэ ин афэсэшIы. Прокуратурэм игъэпсын ыкIи коллективым изэтегъэуцон ветеранхэм яIахьышхо хэлъ. Непэ прокура­турэм IэпэIэсэныгъэ ин зыIэкIэлъ ыкIи шъыпкъагъэр зигъогогъу прокурорхэр зэриIэхэм тырэгушхо.

ШъуигукIуачIэ къыщымыкIэу, псауныгъэ пытэ шъуиIэу, шъуиунагъохэм хъярыр къябэкIэу, шIоу щыIэр къыжъудэхъоу шъущыIэнэу шъуфэсэIо!

АР-м ипрокурорэу, юстициемкIэ я 2-рэ класс зиIэ къэралыгъо упчIэжьэгъоу И.С. Шевченкэр.