Илъэси 101-кIэ узэкIэIэбэжьмэ агъэ­псыгъэ Адыгеим ипрокуратурэ непэ щыIэныгъэм мэхьанэшхо зэрэщиубытырэр нафэ.

Мы структурэм сыдигъуи авторитетышхо иIэу, къэралыгъом хабзэр илъыным, цIыфхэм яфитыныгъэхэр къэухъу­мэгъэнхэм лъыплъэгъэныр ипшъэрылъ шъхьаIэу ыпэкIэ лъыкIотагъ. БлэкIыгъэ илъэсым мэхьанэшхо зиIэ пшъэрылъыбэхэм язэшIохынкIэ гъэхъэгъэшIухэр ышIыгъэх.

Лъэныкъо зэфэшъхьафхэмкIэ хэбзэгъэуцугъэхэр мыукъогъэнхэм, экстремизмэм епхыгъэ бзэджэшIагъэхэр къэ­мы­гъэхъугъэнхэм, тишъолъыр рэхьатныгъэ илъыным прокуратурэм икъулыкъу­шIэхэм анаIэ тырагъэты. ЦIыфхэм яфитыныгъэхэр ыкIи яшъхьафитыныгъэ­хэр къэухъумэгъэнхэмкIэ Iофышхо ашIэ. Республикэм щыпсэухэрэм япсэупIэ, пенсионнэ фитыныгъэхэр зэтегъэуцожьыгъэнхэм прокурорхэр кIэдэух.

Псауныгъэр къэухъумэгъэным, гъэсэныгъэм, псэупIэ-коммунальнэ хъызмэтым, мэкъу-мэщым, нэмыкI лъэныкъохэми хэхъоныгъэхэр ашIынхэм прокуратурэм ынаIэ тырегъэты. Ащ гъэхъагъэу ышIыхэ­рэр зэлъытыгъэр цIыфхэм цыхьэ къазэрэ­фашIырэр ары. Ар къеушыхьаты респуб­ликэм щыпсэухэрэм прокуратурэм икъулыкъухэм зыкъызэрэфагъэзэгъэ пчъагъэм.

АР-м ипрокуратурэ иуцун ыкIи ащ хэхъоныгъэхэр ышIынхэм зиIахьышIу хэзышIыхьэгъэ ветеранхэр ящысэтехыпIэу, ахэм рахьыжьэгъэ Iофыр прокуратурэм иIофышIэ ныбжьыкIэхэм щытхъу хэлъэу лъагъэкIуатэ.

Тиреспубликэ хэбзэгъэуцугъэр зэрэщагъэцакIэрэм, бзэджэшIагъэу зэра­хьэрэр зынэсырэм ыкIи шъолъырым хабзэу илъыр гъэцэкIагъэ хъунымкIэ гъэцэкIэкIо, хэбзэгъэуцу ыкIи хэбзэухъу­мэкIо къулыкъухэм прокуратурэм зэгурыIоныгъэ адыриIэу IофшIэныр зэрэзэхащэрэм ишIогъэшхо къызэрэкIорэр, ащ мэхьанэшхо зэриIэр прокурорхэм къыхагъэщы.

Къэралыгъом ипащэ къыгъэуцугъэ пшъэрылъхэм язэшIохын, ахэм яIофшIэн кIэух дэгъухэр фэхъунхэр къызыхэкIырэр хэбзэ, хэбзэухъумэкIо ыкIи лъыплъэн къулыкъухэм зэпхыныгъэ зэдыряIэу зэрэзэдэлажьэхэрэр ары. Мыщ фэдэ зэпхыныгъэм ишIуагъэкIэ Адыгеим рэхьатныгъэ илъ ыкIи ащ гъэхъагъэхэр ышIыхэзэ ыпэкIэ лъэкIуатэ.