Прокуратурэм иIофшIэнкIэ анахь мэхьанэшхо зиIэр цIыфым ифитыныгъэрэ ишъхьафитыныгъэрэ къэухъумэгъэнхэр ары. Мы къулыкъум даокIэ зыкъыфэзыгъэзэрэ ятфэнэрэ нэбгырэ пэпчъ ифитыныгъэхэр зэтырагъэуцожьых. Прокуратурэм, къэра­лыгъо хэбзэ къулыкъухэм ыкIи хэбзэухъумэкIо ведомствэхэм зэпхыныгъэ азыфагу илъэу зэрэзэдэлажьэхэрэм ишIуагъэкIэ бзэджэшIагъэхэм япчъагъэ нахь макIэ мэхъу.

Мы илъэсым имэзихэу пыкIыгъэм хабзэр ыкIи рэхьатныгъэр гъэпытэгъэнхэмкIэ, цIыфхэм яфитыныгъэхэр ыкIи яшъхьафитыныгъэ, джащ фэдэу обществэм ыкIи къэралыгъом яфедэхэр къэухъумэгъэнхэмкIэ Iофтхьэбзэ гъэнэфагъэхэр зэрахьагъэх. ЗэкIэмкIи хэбзэукъоныгъэ мини 7,6-м ехъу зэрахьагъэу агъэунэфыгъ, IэнатIэм Iут нэбгырэ 1563-мэ дисциплинарнэ, 278-мэ административнэ пшъэдэкIыжьхэр арагъэхьыгъэх. Прокурор уплъэкIунхэм къакIэлъы­кIоу уголовнэ Iоф 26-рэ къызэIуахыгъ.

Прокурорхэр Iофхэм захаплъэхэм республикэм ипредприятиехэм ыкIи иорганизациехэм яIофышIэ 518-мэ яфитыныгъэхэр зэтырагъэуцожьыгъэх, сомэ миллион 19-м ехъу афызэкIагъэкIо­жьыгъ. Предпринимательхэм яфитыныгъэхэм япхыгъэу хэукъоныгъэ 372-м ехъу прокурорхэм къыхагъэщыгъ. Дисциплинарнэ ыкIи административнэ пшъэдэкIыжь нэбгырэ 90-мэ арагъэхьыгъ, шэпхъэ хэбзэ акт 29-м емызэгъыхэу прокурор­хэм къызэкIагъэкIожьыгъ.

Бизнесым пылъхэм яхэбзэ фитыныгъэхэр амыукъонхэм фэшI планым хэтэу ыкIи хэмытэу уплъэкIун Iофтхьабзэхэр прокурорхэм зэрахьагъэх. Ащ нэмыкIэу къэралыгъо ыкIи муниципальнэ зэзэгъы­ныгъэхэм апэIухьащт ахъщэр заказ зытырэм IэкIагъэхьаным лъыплъагъэх. Мы лъэныкъомкIэ чIыфэу ателъыгъэ сомэ миллиони 4,8-рэ арагъэпщыны­жьыгъ.

Мы пIалъэм къыкIоцI бзэджэшIагъэу зэрахьагъэр процент 21,9-кIэ нахь макIэу агъэунэфыгъ. БзэджэшIэгъэ хьылъэ ыкIи хьылъэ дэдэ зезыхьагъэхэм япчъагъэ процент 1,5-кIэ къеIыхыгъ. Къолъхьэ тын-Iыхыным епхыгъэ бзэджэшIагъэу зэрахьэхэрэми прокуратурэм лъэшэу ынаIэ тет. Къолъхьэ тын-Iыхыным пэшIуекIогъэнымкIэ хэбзэгъэуцугъэр аукъуагъэу гъогогъуи 189-рэ къыхагъэщыгъ, нэбгыри 126-мэ административнэ ыкIи дисциплинарнэ пшъэдэкIыжьхэр арагъэхьыгъэх.

Игорь Шевченкэм къызэриIуагъэмкIэ, анахь шъхьаIэу щытын фаер цIыфхэм ясоциальнэ фитыныгъэхэр къэухъумэгъэнхэм ыкIи зэтегъэуцожьыгъэнхэм, Iэзэгъу уцхэр ыкIи медицинэ пкъыгъо­хэр, сэкъатныгъэ зиIэхэр щыIэныгъэм хэгъэгъозэжьыгъэнхэмкIэ ящыкIэгъэщт техникэр аIэкIэгъэхьэгъэным епхыгъэ Iофыгъохэр ары. Джащ фэдэу зыныбжь имыкъугъэхэм, анахьэу сабый ибэхэм, псэупIэхэр ягъэгъотыгъэнхэм, социальнэу мыухъумэгъэ цIыфхэм IэпыIэгъу афэхъугъэным анаIэ атырагъэты.

Джащ фэдэу цIыфхэм яIофшIэн фитыныгъэхэр амыукъонхэм фэгъэзэгъэ къулыкъухэм яуполномоченнэхэм, шъолъырым ихэбзэухъумэкIо къулы­къухэм зэхэубытэгъэ Iофтхьабзэхэр зэ­хащэх.