Социальнэ инфраст­руктурэмрэ зекIонымрэ хэхъоныгъэ ягъэшIыгъэным пае газифика­циемкIэ амалэу щыIэхэм Мыекъопэ районым щатегущыIагъэх.

Мы Iофыгъохэм афэгъэ­хьыгъэ зэIукIэр респуб­ликэ парламентым и Тхьа­матэу Владимир Нарожнэм зэрищагъ.

Джыдэдэм Мыекъопэ районым ипсэупIэхэм япроцент 60 фэдизыр ары гъэстыныпхъэ шхъуантIэр зылъыIэсыгъэр. Социальнэ газификациемкIэ программэмрэ проектхэмрэ яшIуа­гъэкIэ а пчъагъэм зыкъи­Iэтыщт. Километрэ 32-м ехъу зикIыхьэгъэ, псэупIэ­хэр зэзыпхыщт газрыкIопIи 8, километрэ 16 зи­кIыхьэгъэ газрыкIопIи 9 къуаджэхэм ащагъэпсынэу рахъухьэ. ПстэумкIи псэу­пIи 9-мэ гъэстыныпхъэ шхъуантIэр аIэкIагъэхьащт.

Джащ фэдэу газ инфраструктурэм ипсэолъитIу Мыекъопэ районым щагъэ­псынэу, зыгъэпсэфыпIэу «Лэгъонакъэ» екIущт газрыкIуапIэу километрэ 62-рэ зикIыхьэгъэщтыр чIы­чIэгъым чIалъхьанэу, ДжэгуакIом игъэхъунэ ирекреационнэ-зекIо парк километри 7,4-рэ зикIы­хьэгъэщт газрыкIуапIэ щашIынэу рахъухьэ.

Къуаджэхэм социальнэ мэхьанэ зиIэ псэуалъэу адэтхэм, апэрэ чэзыоу фельдшер-мамыку IэзапIэ­хэм гъэстыныпхъэ шхъуан­тIэр зэраращэлIэщтым зэ­IукIэм щатегущыIагъэх. ПрограммэмкIэ фэгъэкIо­тэныгъэу щыIэхэр цIыфхэм нахь икъоу зэлъягъэшIэгъэн зэрэфаер ащ щыхагъэунэфыкIыгъ. Газифи­кациемкIэ лъэIу тхылъыр джы компаниеу «Газпром» газораспределение Майкоп» зыфиIорэм исайткIи, порталэу «Къэралыгъо фэIо-фашIэхэр» зыфиIо­рэмкIи, «Сидокументхэр» зыфиIорэ гупчэхэмкIи аIэ­кIагъэхьан алъэкIыщт. Социальнэу икъоу мыу­хъумагъэхэм сомэ мини 100-м нэсэу компенсацие аратыщт.

Iахьзэхэлъ обществэу «Газпром межрегионгаз Майкоп» зыфиIорэм игенеральнэ пащэу ЕкъутэкI Аслъан зэIукIэм къызэрэщиIогъагъэмкIэ, Мыекъопэ районым ис нэбгырэ 3757-мэ газификациемкIэ лъэIу тхылъхэр къарахьылIагъэх, зэзэгъыныгъэ 3080-рэ ада­шIыгъ, газрыкIопIэ 1800-рэ фэдиз лъэIу тхылъ къэзытыгъэхэм яхапIэхэм аращэлIагъ, унэ 800-м ехъур гъэстыныпхъэ шхъуан­тIэм пашIагъ. Псэо­лъэшIын-монтаж IофшIэнхэр нахь псынкIэу зэшIозыхыщт бригадэ тедзэхэри, подряд организациехэри зэхащагъэх.