Урысые Банкым иотделение — Адыгэ Республикэм и ­Лъэпкъ банк къызэритыгъэмкIэ, мы илъэ­сым иапэрэ мэзих Адыгеим ит банкмэ банкнотэ 11 нэпцIэу къы­хагъэщыгъ — ар 2022-рэ илъэ­сым мыщ фэдэ иуахътэ егъэпшагъэмэ, 16-кIэ нахь макI.

Сомэ минитф зэрытхэгъэ ахъщэ нэпцIэу блы къыхагъэщыгъ, плIыр — сомэ мин зырызых.

«Урысыем и Банк егъэджэнхэр мы IофыгъомкIэ ренэу регъэкIокIых. Тучанмэ якассэмэ атесхэр ахэм къахагъэлажьэх, сыда пIомэ ахэр ары нахьыбэрэ щэфакIохэм ахъщэр къязытырэр, къекIокIырэ ахъщэ­хэмрэ нэпцIыхэмрэ зэхашIыкIы-шъун фае, — къеIуатэ Урысые Банкым иотделение — Адыгэ Республикэм и Лъэпкъ банк ипащэ игуадзэу Ирина Одинцовам. — Ахъщэ нэпцIымрэ шъыпкъэмрэ зэхэзышIыкIын зылъэкIыщтыр Урысые Банкым ихэушъхьафыкIыгъэ приложений ары. Ар смартфоным тебгъэуцон плъэкIыщт. Апэ банкнотэ къэугупшысыгъэмкIэ зыбгъэсэшъущт, етIанэ шIэныгъэу зэбгъэ­гъотыгъэмкIэ къекIокIырэ ахъщэ шъыпкъэхэмрэ нэпцIыхэмрэ рыуплъэкIушъущтых».

«Урысые Банкым ибанкнотэхэр» зыфиIорэ мобильнэ приложением къекIокIырэ ахъщэр зэкIэ рыууплъэ­кIушъунэу гъэпсыгъэ, ахэр къызэраухъумэрэ шъэфхэр ипрограммэ къыделъытэх. Ахъщэр зэрэнэпцIыр приложением къыIопщырэп, ау къегъэлъагъо шапхъэм зыщытекIырэ чIыпIэхэр, къэбарэу ахъщэм пылъым ущегъэгъуазэ. Приложениер Урысыем и Банк исайт ит, зищыкIагъэмэ агъэфедэн амал яI.

Ащ фэшъхьафэу, Урысыем и Банк ибанкнотэмэ яшъыпкъагъэ къэзыушыхьатырэ шIыкIэу рахьы­лIагъэхэм афэгъэхьыгъэ къэбарыр едзыгъоу «КъекIокIырэ ахъщэхэр» зыфиIорэм ибгъотэн плъэкIыщт.