Дышъэ медаль къыхьыгъ
Адыгеим иросгвардейцэ шъхьэзэкъо бэнэнымкIэ Къыблэ шъолъырым изэнэкъокъу дышъэ медаль къыщихьыгъ.
Пшызэ икъэлэ шъхьаIэ испорт комплексэу «Екатеринодар» зыфиIорэм щыкIогъэ Iофтхьабзэм нэбгырэ 91-рэ хэлэжьагъ. Росгвардием Адыгэ РеспубликэмкIэ и ГъэIорышIапIэ къэзыгъэлъэгъогъэ Руслан Чатоевым гъэхъэгъэшIухэр ышIынхэ фызэшIокIыгъ, зэIукIэгъоу иIагъэр зэкIэ къыхьыгъ. Килограмм 65-м нэс къэзыщэчыхэрэм якуп ар хэтыгъ.
— ТекIоныгъэр къызэрэдэсхыгъэм лъэшэу сигъэгушIуагъ. Сигупсэхэм ыкIи къыспэблагъэхэм яIэпыIэгъу кIуачIэ къыситыгъ, гъэхъэгъэшIу сшIыным сыфищагъ, — къыIуагъ Руслан Чатоевым.
Турнирым текIоныгъэр, хагъэунэфыкIырэ чIыпIэхэр къащыдэзыхыгъэхэм къафэгушIуагъ ыкIи къалэжьыгъэ медальхэр, тынхэр къаритыжьыгъэх Росгвардием ишъолъыр къутамэ ипащэу, генерал-майорэу Александр Решетниковым.
Зэнэкъокъум изэфэхьысыжьхэм адиштэу мы спорт лъэпкъымкIэ Къыблэ шъолъырым ихэшыпыкIыгъэ командэ хэтыщтхэр агъэнэфагъэх.