Адыгеим и ЛIышъхьэ ипланернэ зэхэсыгъо щатегущыIагъэх лъэпкъ проектхэмрэ къэралыгъо программэхэмрэ къадыхэлъытагъэу республикэ псэуалъэхэу ашIыхэрэр, игъэкIотыгъэу агъэцэкIэжьыхэрэр зыдиштэн фэе шапхъэхэм атетэу ипIалъэм ухыгъэнхэм япхыгъэ Iофыгъохэм.

Республикэм и ЛIышъхьэу КъумпIыл Мурат министерствэхэм яIэшъхьэтетхэм, чIыпIэхэм ыкIи подряднэ организациехэм япащэхэм ягъусэу ипIалъэм къыпэу еджапIэхэр, кIэлэцIыкIу IыгъыпIэхэр, культурэм иунэхэр ыкIи инфраструктурнэ псэуалъэхэр тыгъэнхэм пае амалэу щыIэхэм ахэплъагъэх.

Мы зэIукIэм джащ фэдэу хэлэжьа­гъэх АР-м иминистрэхэм я Кабинет и Тхьаматэу КIэрэщэ Анзаур, АР-м и Къэралыгъо Совет — Хасэм и Тхьаматэу Владимир Нарожнэр, федеральнэ ыкIи республикэ къулыкъухэмрэ ведомствэхэмрэ япащэхэр, псэолъэшI компаниехэм ялIыкIохэр.

АР-м иминистрэхэм я Кабинет и Тхьаматэ къызэриIуагъэмкIэ, лъэпкъ проектхэм япхырыщынкIэ бюджетым сомэ миллиард 12,5-рэ къыщыдэлъы­тагъ, къэралыгъо программэхэмкIэ — сомэ миллиарди 8,5-рэ. Контрактациер процент 79-рэ мэхъу, бюджетыр процент 50-кIэ гъэцэкIагъэ хъугъэ.

«Псэуалъэхэм ащыщхэр ипIалъэм къыпэу тэтых, ау ащ дакIоу тшIыхэрэри дгъэцэкIэжьхэрэри шэпхъэ гъэнэфагъэу щыIэхэм икъоу адиштэнхэ фае. Подряднэ организациехэм акIуачIэ зэрахьылIэн фаер агъэ­псырэ ыкIи агъэкIэжьырэ псэуа­лъэхэр щынэгъончъэнхэм, Iэрыфэгъоу щытынхэм япхыгъэ шапхъэхэм икъоу адиштэнхэр ары», — къыхигъэщыгъ КъумпIыл Мурат.

ПсэолъэшI ыкIи гъэцэкIэжьын Iофхэм афэгъэзэгъэ компаниехэм яIэшъхьэтетхэм къаIотагъ гъогухэм, гъэсэныгъэм, культурэм ыкIи медицинэм япхыгъэ псэуалъэхэм яшIынкIэ, чIыпIэхэм язэтегъэпсыхьанкIэ, «Псы къабз» зыфиIорэ федеральнэ проектыр, джащ фэдэу коммунальнэ инфраструктурэр гъэкIэ­жьыгъэнымкIэ республикэ программэр пхырыщыгъэнымкIэ пшъэрылъэу яIэхэр гъэцэкIагъэ зэрэхъухэрэм афэгъэхьыгъэу.

Лъэпкъ проектхэмрэ къэралыгъо про­граммэхэмрэ ахэхьэгъэ псэуалъэхэм къыкIэлъыкIохэрэр ащыщых: нэбгырэ 1100-м телъытагъэу къалэу Мыекъуапэ, къуаджэу АдыгеякIэм ыкIи къэлэгъэпсыкIэ зиIэ псэупIэу Яблоновскэм аща­шIыщт еджэпIакIэхэр, къуаджэу Бжыхьэкъо­ежъым нэбгырэ 250-м телъытэгъэ еджа­пIэу щагъэпсыщтыр. Ащ нэмыкIэу зыныбжь хэкIотагъэхэмрэ сэкъатныгъэ зиIэхэмрэ апае Республикэ унэ-интернатэу «Активное долголетие» зыфиIорэм иотделениеу агъэпсырэр, къутырэу Гавердовскэм ыкIи къуаджэу Джэджэхьаблэ ащашIырэ амбулаториехэр. Джащ фэдэу псэупIэу Инэм — IэзапIэ, псэупIэу Табачнэм — гъэсэныгъэ зыщарагъэ­гъотыщт гупчэу N 2-р, къуаджэу Хьа­лъэкъуае — культурэм и Унэ, къуаджэу Пщычэурэ псэупIэу Заревэмрэ нэбгыри 120-рэ зычIэфэщт кIэлэцIыкIу IыгъыпIэхэу ащагъэпсыхэрэр. ИскусствэхэмкIэ кIэлэцIыкIу еджапIэу N 6-р зэтырагъэпсыхьэ, концерт залэу «Налмэсыр» игъэкIотыгъэу агъэцэкIэжьы. ПсэупIэу Тульскэм искусствэхэмкIэ еджапIэу дэтыр игъэкIотыгъэу агъэцэкIэжьы, джащ фэдэу къалэу Мыекъуапэ дэт гурыт еджапIэхэу N 3-мрэ N 23-мрэ, лицееу N 8-р агъэцэкIэжьынхэу рагъэжьагъ, псэупIэу Дахъом дэт гупчэу гъэсэныгъэ зыщарагъэгъотырэм, къутырэу Чернышевым дэт гурыт еджапIэу N 8-м гъэцэкIэжьын IофшIэнхэр ащэкIох. Социальнэ инфраструктурэм къыхиубытэрэ псэуалъэу зигугъу къэтшIыгъэхэм ыкIи нэмыкIхэм афэгъэзагъэх подряднэ организацие 20 фэдиз.

КъумпIыл Мурат икIэухым министерствэхэм, ведомствэхэм, джащ фэдэу муниципалитетхэм япащэхэм пшъэрылъ къафишIыгъ 2024-рэ илъэсым гъэцэкIагъэ хъун фаеу щыт социальнэ ыкIи инфраструктурнэ проектыкIэхэм япхыгъэ сметнэ документхэр пшъэдэкIыжь хэ­лъэу зэхагъэуцонхэу.

АР-м и ЛIышъхьэ ипресс-къулыкъу