Адыгеим и ЛIышъхьэу КъумпIыл Мурат министрэхэм я Кабинет хэтхэм адызэхищэгъэгъэ зэIукIэм коммунальнэ инфраструктурэм къыхиубытэрэ псэуалъэхэм яшIынкIэ ыкIи ягъэкIэжьынкIэ IофшIэнхэр зэрагъэцакIэхэрэм щатегущыIагъэх.

АР-м псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэ иапэрэ гуа­дзэу Лафышъ Рэмэзан къалэу Мыекъуа­пэ укъэбзалъэхэм яшIын зэрэщыкIорэм фэгъэхьыгъэу къыIотагъ. 2023-рэ илъэ­сым сомэ миллион 587-м ехъу ахэм апэIуагъэхьанэу къыдалъытэгъагъ. Урысыем псэолъэшIынымкIэ и Министерствэ 2024-рэ илъэсымкIэ лимитхэм атегъэ­псыхьэгъэ лъэIу тхылъыр IэкIагъэхьагъ псэолъэшIыныр лъыгъэкIотэгъэным пае.

ЗэIукIэм илъэхъан тапэкIэ аэропортэу щытыгъэм ичIыгу Iахьхэу сабыибэ зэрыс унагъохэм апае агъэнэфэгъагъэхэм инженер инфраструктурэмкIэ ящыкIагъэ­хэр зэшIохыгъэнхэм къыщыуцугъэх. Сомэ миллион 40,8-м ехъу зытефэщт зэзэгъы­ныгъэм къыдилъытэрэ мылъкум ипроцент 50 агъэфедэгъах.

Къалэу Мыекъуапэ имикрорайонэу урамэу Михайловым ыкIыбкIэ гъэзагъэм изэтегъэпсыхьани къыщыуцугъэх. Iоф­шIэнэу агъэцэкIэщтхэм къадыхэлъытагъэу щыт котельнэм ишIын, фабэр ыкIи псыр аIэкIэгъэхьэгъэныр.

Ащ нэмыкIэу поликлиническэ отделением пае ящыкIэгъэщт Iэмэ-псымэ гъэнэфагъэхэр къащэфыщтых.

Тэхъутэмыкъое районми IофшIэны­шхо щызэшIуахынэу щыт. 2023-рэ илъэсым электричествэм икъэкIуапIэхэм апышIэгъэнхэм пае сомэ миллиони 117-рэ къафыхагъэкIыгъ. 2024-рэ илъэсым сомэ миллион 263-м ехъу агъэфедэщт. Рес­публикэм икъэлэ шъхьаIэ итранспорт гъэкIэжьыгъэным иIофыгъуи мы зэIукIэм къыщаIэтыгъ. Общественнэ транспортым игъэкIэжьын тегъэпсыхьагъэу къызэрэхагъэщыгъэмкIэ, 2023 — 2024-рэ илъэс­хэм автобус 46-рэ къащэфынэу ары. Республикэм и ЛIышъхьэ Мыекъуапэ итранспорт системэ хэхъоныгъэ егъэшIыгъэнымкIэ мы Iофыгъом мэхьанэ­шхо зэриIэр къыхигъэщыгъ.

Федеральнэ проектэу «Псы къабз» зыфиIорэм къыдыхэлъытагъэу мы илъэ­сым муниципалитетхэм псэолъэ 13 ащызэтырагъэпсыхьажьыщт. Ахэм сомэ миллион 308-рэ фэдиз апэIухьащт. Адыгэкъалэ икоммунальнэ системэ игъэ­кIэжьынкIэ программэм къыдыхэлъытагъэу фэбэрыкIуапIэхэм язэтегъэ­псы- хьан сомэ миллион 276-рэ пэIуагъэ­хьащт.

Iофыгъоу зытегущыIагъэхэм якIэуххэр зэфихьысыжьхэзэ Адыгеим и ЛIышъхьэ анахьэу анаIэ зытыраригъэдзагъэхэм ащыщ подряднэ организациехэм IофшIэнхэр ипIалъэм аухынхэ зэрэфаем имызакъоу, ахэр шэпхъэшIухэм адиштэхэу гъэцэкIагъэ хъунхэ зэрэфаер.

«Коммунальнэ комплексым ишIынкIэ ыкIи игъэкIэжьынкIэ республикэм Iофышхо щызэшIуахы. ПсынкIэу зэшIотхын фэе Iофыгъуабэ зэтырихьагъ. ЦIыфхэм ящыIакIэ нахьышIу шIыгъэныр хэбзэ къулыкъухэм апашъхьэ ит анахь Iофыгъо къин­хэм язэшIохын занкIэу епхыгъ. Проектхэм язэхэгъэуцонкIи, социальнэ, инфраструктурнэ псэуалъэхэр шIы­гъэнхэмкIи а пстэуми мэхьанэшхо яI», — къыхигъэщыгъ КъумпIыл Мурат.

АР-м и ЛIышъхьэ ипресс-къулыкъу