Хыкъумэу Псынэдахэ иIэгъо-благъохэм мышъэ щыритIу янэ ягъусэу зекIохэм бэрэ зэращалъэгъурэр Кавказ заповедникым иадминистрацие ипресс-къулыкъу къы­Iуагъ. Ахэр цIыфхэм благъэу къямыкIуалIэхэрэми, агъэщынэнхэу ыкIи Iуафынхэу фежьэх.

Псы ешъонэу хыкъумым къы­Iухьэрэ мышъэхэр гъэмэфэ жъоркъым зэрэIуафыхэрэр зы­гъэпсэфакIохэми, заповедникым иIофышIэхэми алъэгъу.

Заповедникым инаучнэ IофышIэу Юлия Акатовар къу­шъхьэхэм ахэхьэрэ пстэумэ къяджагъ мышъэхэр зыщыпсэухэрэ чIыпIэхэр къаухьэхэзэ ашIынэу, ахэм узэрадэзекIон фэе шIыкIэхэр амыукъонхэу.

Псэушъхьэ инхэм уаIумыкIэным фэшI мэзхэм апхырыкIыхэрэ зекIо лъагъохэм уатемыкIымэ нахьышIу. Мышъэр уапэ къифагъэмэ, кIэпIэныр хэукъоныгъ. Ахэм анэхэм дэгъоу алъэгъурэп, цIыфыри ащ ымылъэгъун ылъэкIыщт. Ау укъылъэгъоу, ыужырэ лъакъо­хэмкIэ зыкъызиIэтыкIэ, ар къып­тебэнэнэу зигъэхьазырэу къи­кIырэп — цIыфыр къы­лъэгъу шIоигъу.

Мышъэр зыплъэгъукIэ, уакIыб фэмыгъазэмэ нахьышIу. МэкIэ-макIэу узэкIакIомэ уIэпыкIыщт, рюкзак е щыгъын горэ пIыгъымэ, уашъхьагъ­кIэ лъагэу дэпхьыемэ дэгъу, мышъэр ежь нахьи нахь лъагэм, нахь иным щэщтэ.

— Мышъэ щыр шъуапэ къифагъэмэ, ащ яни зэрэблагъэр зыщышъумыгъэгъупш, — еIо Ю. Акатовам. — Шъумыгъащтэ ыкIи шъумыкуу, мышъэ анэм ищыр къыухъумэн фаеу шIошIынышъ, изэрар къыуигъэкIын ылъэкIыщт. ЦIыфхэр мышъэхэм зэращыщынэхэрэм фэдэу ежьхэри ахэм къащэщынэх.

БэшIагъэп зекIо купитIоу «Ошъутенэ» дэкIоягъэхэм апэ зы мышъэ­рэ ищыритIурэ апэ къызифэгъагъэхэр. Мышъэр цIыфхэм къяплъи, щынагъо зэрэщымыIэр къызыгурэIом, игъогу техьажьыгъ.

Мыгъэрэ гъэмафэр жъоркъ зэпыт. ЦIыфхэм афэд мышъэ­хэри, псы ешъохэ ашIоигъу. Арышъ, уаIукIагъэмэ, дэхэ-дахэу уаблэкIыныр нахьышIу.

Шъаукъо Аслъангуащ.