Мыекъопэ къэралыгъо технологическэ университетым 2023 — 2032-рэ илъэсхэм хэхъоныгъэ егъэшIыгъэнымкIэ программэр Урысые шIэныгъэмрэ апшъэрэ гъэсэныгъэмрэкIэ и Министерствэ ыштагъ.

А программэм игъэцэкIэн пэIуагъэхьанэу сомэ миллиард 1,8-рэ къыдалъытагъ.

Адыгеим и ЛIышъхьэу КъумпIыл Мурат программэм дыригъэштагъ. Республикэ пащэм итхыгъэу федеральнэ гупчэм агъэхьыгъэм къыщыреIотыкIы Адыгеим иэкономикэ зыкъе­гъэIэтыгъэнымкIэ МКъТУ-м Iоф­шIэнышхо зэришIэрэр. Ащ къызэрэкIигъэтхъыгъэмкIэ, мэкъу-мэщым, псэолъэшIыным, гъомылапхъэмэ ятехнологие, геодезием, чIыгум, архитекту­рэм, чIыопсым ибаиныгъэ дэлэжьэгъэным, тыкъэзыуцухьэрэ дунаим, псауныгъэм якъэухъу­мэн афэгъэзэгъэщт сэнэхьатхэр зыщызэрагъэгъотырэ апшъэрэ еджапIэу а зыр ары шъолъырым итыр.

Адыгэ Республикэм социальнэ-экономикэ хэхъоныгъэ 2030-рэ илъэсым нэс егъэшIыгъэным и Стратегиерэ МКъТУ-м ипрограммэу 2023 — 2032-рэ илъэс­хэм ателъытагъэмрэ япшъэ­рылъ­хэр зэтефэх. Зыщызэте­фэхэрэм ащыщых цIыфым икапитал, технологичнэ агропромышленнэ комплексым, зекIоным, энергетикэ уцышъом ыкIи къыдэгъэкIыжьын промышленностым хэхъоныгъэхэр ягъэ­шIыгъэнымкIэ ягухэлъхэр. Джащ фэдэу мэхьанэшхо зэратырэ проект инхэм — Тэхъутэмыкъое районым ит промышленнэ шъолъырымрэ къушъхьэ экокурортэу «Лэгъонакъэрэ» — ягъэ­цэкIэн зэдыхэлэжьэнхэу ра­хъухьэ.

«Программэм къыгъэнэфэгъэ планыр гъэцэкIагъэ хъумэ, Адыгэ Республикэм ищыкIэгъэ кадрэхэр зэкIэ ыгъотыщтых, шIэныгъэр яIэубытыпIэу Адыге­им ииновационнэ инфраструктурэ ыпэкIэ лъагъэкIотэщт. А IофыгъошIухэр къыдэтлъытэхэзэ, Адыгэ Республикэм программэр игъо шъыпкъэу елъытэ ыкIи ащ игъэцэкIэн дырегъ­штэ», — къыщеIо документым.

Мыекъопэ технологическэ университетым мы илъэсипшI благъэм зэшIуихыщт Iофыгъо­хэмкIэ пшъэрылъхэр ыгъэнэфагъэх. Апшъэрэ еджапIэр Адыге­им иэкономикэ ищыкIэгъэ кадрэхэр къэзыгъэхьазырырэ ыкIи инновационнэ технологиехэр зыгъэфедэрэ шъолъыр гупчэу хъущт. Ащ пае технологическэ предпринимательствэмрэ проектнэ IофшIэнымрэ ащыпылъыщтых, экосистемэм изы Iахьэу зыкъыгъэлъэгъощт.

 Iофтхьабзэу программэм къыдилъытэхэрэр проектиблэу гощыгъэх: «Шъолъырым иинженернэ-техническэ куп щыгъэпсыгъэныр», «ШIэныгъэ-гъэсэныгъэ кластерэу агробиотехнологием фэгъэзагъэм хэхъоныгъэхэр егъэ­шIыгъэнхэр, НИИСХ-м иамал­хэр ащ фэшI гъэфедэгъэн­хэр», «Кадрэ ыкIи шIэныгъэ-инновационнэ екIолIакIэ иIэу псау­ныгъэр къэухъумэгъэным итехнологиерэ медицинэмрэ яси-­ с­темэ Iоф егъэшIэгъэныр»,

АР-м ипроект инхэм ахэгъэлэжьэгъэныр», «Технологическэ предпринимательствэм ыкIи проектнэ IофшIэным игупчэу МКъТУ-р шIыгъэныр», «Искусственнэ акъылыр ыкIи цифровизациер экономикэм щыгъэфедэгъэныр: кадрэхэмкIэ, проектхэмкIэ, технологиехэмкIэ», «Университетым дзэ егъэджэн гупчэ къыщызэIухыгъэныр».

Стартап-проектхэмкIэ агъэ­псырэ хъызмэтшIэпIэ цIыкIухэр фэдищкIэ нахьыбэ хъунхэу — 3-м къыщегъэжьагъэу 10-м нэсынхэу мэгугъэх. Джащ фэдэу рагъаджэхэрэр 2022-рэ илъэсым мини 8,6-рэ хъущтыгъэмэ, а пчъагъэр 2032-м мин 13,4-м  нагъэсынэу рахъухьэ.

Программэр МКъТУ-м исайт къыщыхаутыщт.