Республикэм иныбжьыкIэ­хэмкIэ анахь мэхьанэ­шхо зиIэ хъугъэ-шIагъэм — сэнаущыгъэ зыхэлъ ныбжьыкIэхэм яслетэу «Фыщтым» изыфэгъэхьазырын рагъэжьагъ.

Темыр-КъохьэпIэ Кавказым ишыгу анахь дэхэ дэдэхэм зыкIэ ащыщым ылъапсэ дэжь ятфэнэрэу слетыр щыкIощт. ПэшIорыгъэшъэу зэрагъэнэфа­гъэмкIэ, шышъхьэIум и 18-м къыщегъэ­жьагъэу и 20-м нэс ар кIощт.

Хэлэжьэщт­хэми япчъагъэ нахь зэрэхэхъощтым республикэм ипащэхэм анаIэ тырагъэты: Адыгеим имуниципалитетхэм, Краснодар краим, Къэрэщэе-Щэрджэсым ыкIи Къэ­бэртэе-Бэлъкъарым ялIыкIохэм мы илъэсым къахэхъощтых Къалмыкъым иныбжьыкIэхэр.

«Министерствэхэм ыкIи районхэм япащэхэм зэIукIэу адысиIагъэм пшъэ­рылъ ащыфэсшIыгъ ухьазырын Iофтхьабзэхэр нахь агъэлъэшынхэу, сэнаущ зыхэлъ ныбжьыкIэхэу еджэным, наукэм, спортым, культурэм гъэхъагъэхэр ащызышIыгъэхэр ахэм ахагъэхьанхэу. Дэгъухэм анахь дэгъужьхэр ары муниципалитетхэм къащагъэнэфэн фаехэр.

Мэфищым къыкIоцI слетым хэлэжьэщтхэм программэ гъэшIэгъон къяжэ: заохэр зыщыкIогъэхэ къушъхьэлъэ чIыпIэхэм, къушъхьэтхыхэм, мылылъэ чIы­пIэхэм, хьыкумхэм зэранэсыщтхэм анэ­мыкIэу цIыфхэр жъугъэу зыхэлэжьэхэрэ культурнэ Iофтхьабзэхэри, яшIэныгъэхэм зэрахагъэхъощт амалхэри агъэнэфагъэхэм ахэхьэх. Хабзэ зэрэхъу­гъэу, министрэхэм, къалэхэмрэ рай­онхэмрэ япащэхэм тызэхэтэу пхъэмашIом дэжь ныбжьыкIэхэм тырягъусэу ахэр зыгъэгумэкIхэрэ Iофыгъохэм татегущыIэщт», — къыIуагъ Адыгеим и ЛIышъхьэу КъумпIыл Мурат.