Пыдзэфэ пытэхэм ядэщын фэгъэзэгъэ шъолъыр операторым иIоф­шIэн гъэмэфэ уахътэм нахьыбэ мэхъу. Мэкъуогъу ыкIи бэдзэогъу мазэу кIуагъэхэм кубометрэ мин 26-рэ фэдиз хэкIитэкъупIэ полигоным ащ иавтомашинэхэм ращэлIагъ. Ар ыпэрэ мазэхэм, гурытымкIэ лъытагъэу, дащыщтыгъэм нахьи проценти 10-кIэ нахьыб.

— Гъэмэфэ уахътэр къимыхьэзэ пштэмэ, хэкIыр дэзыщырэ автомашинэхэм яграфик зы мафэкIэ проценти 100-у агъэцакIэщтыгъ. Мы аужырэ мэзитIоу кIуагъэми, джы тызыхэтыми автомашинэм маршрутым ты­рищын фаер зэкIогъукIэ ымыукIочIышъоу, непэ пчъагъэрэ полигоным хэкIыр ыщэн, етIани къыгъэзэжьынышъ зытетыгъэ маршрут дэдэм къытенэгъэ пыдзафэхэр тырищынхэ фаеу мэхъу. Тиавтомашинэхэм зэкIэми ГЛОНАСС системэр арыт, диспетчерхэмрэ уплъэкIуакIохэмрэ алъэплъэх. Арышъ, хэкIыр зыщыIуащырэми, зыдащэрэми сыдигъокIи тыщы­гъуаз. А IофшIэныр зэпымыуным фэшI ятIонэрэ сменэ дгъэпсыгъ. Тэ техникэ зэфэшъхьафэу 65-рэ тиI. Ахэм ямызакъоу, нэмыкI организациехэм ятехникэ ыкIи яIофы­шIэхэр къыхэтэгъэлажьэх, — къыIуагъ пшъэдэ­кIы­жьэу ыхьырэмкIэ гъунэпкъэ гъэнэфагъэ зиIэ обществэу «ЭкоЦентр» зыфиIорэм и Адыгэ шъолъыр къутамэ ипащэу Алыбэрд Налбый.

Арэу щытми, хэкIыр зэрыз контейнерхэм ясурэтхэр со­циальнэ интернет нэкIубгъохэм етIупщыгъэу къарэхьэх. ЦIыф­хэм япсэупIэхэр къэбзэнхэм зэрэ­фэбанэхэрэр тигуапэ, амалэу тиIэмкIэ ащ тэри ыуж тит. Графикым зыщамыгъэгъуа­зэу апэ къифэрэ контейнер ушъагъэм исурэт къырамыгъэ­хьанэу блогер чанхэм тялъэIу.

ЦIыфхэм зэпхыныгъэ адытиIэныр тиIофшIэн щыщ. Арышъ, сыдигъокIи гущыIэгъу тыкъышъу­фэхъунэу тыхьазыр. Шъолъыр операторым Iоф зэришIэрэм ылъэныкъокIэ предложение е упчIэ зиIэр мы телефонхэмкIэ къытеон ылъэкIыщт: 8-800-707-05-08, 8-962-868-14-62.

«ЭкоЦентрэм» и Адыгэ шъолъыр къутамэ ипресс-къулыкъу. Сурэтыр: «ЭкоЦентрэм» и Адыгэ шъолъыр къутам.