Урысые спорт марафонэу «Урысыем ыкIуачI» зыфиIорэм къыдыхэлъытагъэу хьафизэхэм апае джырыблагъэ рекIокIыгъэ Iофтхьабзэр зэхэзыщэгъагъэхэр партиеу «Единэ Россием» дезгъаштэхэрэр ары. Ахэм ягъусагъэх хьафизэхэм я Урысые обществэ и Адыгэ шъолъыр организациерэ «НыбжьыкIэ Гвардием» илIыкIохэмрэ. Мы Iофтхьабзэм пшъэрылъ шъхьаIэу иIагъэр физическэ культурэмрэ спортымрэ нахьыбэ ахэщэгъэ­ныр, щыIэкIэ-псэукIэ тэрэзым игъогу ныбжьыкIэхэр тещэгъэн­хэр, амалэу яIэхэм зягъэушъомбгъугъэныр ары.

Спорт лъэпкъитфымкIэ зэнэкъокъухэр кIуагъэх: шашкэхэмкIэ, шахматхэмкIэ, дартсымкIэ, шоуданымкIэ ыкIи армреслингымкIэ.

«ЗэкIэ зэнэкъокъухэр гуфэбэныгъэ хэлъэу рекIокIыгъэх, хэлэжьагъэхэми гуетыныгъэ къахилъхьагъ. ТекIоныгъэр къыдэзыхыгъэхэм щытхъу тхылъхэр, IэшIу-IушIухэр аратыгъэх», — къыIуагъ партиеу «Единэ Россием» дезгъаштэхэрэм япащэ игуадзэу Анатолий Коршуновым.

Хьафизэхэм афытегъэпсыхьэгъэ оборудованиер мыщкIэ къызфагъэфедагъ.

«Партиеу «Единэ Россием» илъэпкъ программэ къыдыхэлъытагъэу физическэ культурэмрэ спортымрэ апылъынхэм пае зэкIэ амалэу щыIэр агъэфедэ. Зэрэхэгъэгоу пштэмэ, нэбгырэ мин 72-рэ ащ хэлэжьагъ, пстэумкIи Iофтхьабзэу зэхэтщагъэр мини 4-м ехъу. Джыри спорт Iофтхьэбзэ заулэ зэхэтщэн мурад тиI. Мыщ фэдэ сайтымкIэ фаехэм зарагъэтхын алъэкIыщт: «https: //sila – rossii.er.ru/», — къыIуагъ партиеу «Единэ Россием» и Генеральнэ совет хэтэу, Адыгеим и «НыбжьыкIэ Гвардие» ипащэу Бэрзэдж Асыет.

Шъугу къэтэгъэкIыжьы: мэкъуогъум и 1-м къыщыублагъэу Урысые марафонэу «Урысыем ыкIуачI» зыфиIорэр макIо. Физкультурникым и Мафэу шышъхьэIум и 12-м хагъэунэфыкIырэм тефэу мэфэкI фестивалыр кIощт. Джа лъэхъаным спортсмен цIэрыIохэм ацIэкIэ шIухьафтынхэри аратыщтых.