БлэкIыгъэ зыгъэпсэфыгъо мафэхэм Адыгеим игъогухэм къатехъухьэгъэ тхьамыкIагъохэм апкъ къикIэу нэбгыри 7-мэ шъобжхэр атещагъэ хъугъэ. Мы мафэхэм Мыекъуа­пэрэ Адыгэкъалэрэ ягъогухэм гъогогъу 20-рэ гумэкIыгъо щифагъэх.

ШышъхьэIум и 6-м мафэм сыхьатыр 3-м адэжь Мыекъуапэ щыщ хъулъфыгъэу илъэс 26-рэ зыныбжьыр тихэгъэгу къыщыдагъэкIыгъэ автомобилыр фэмыгъэIорышIэу Мыекъуапэ иурам щыдэчъэхыгъ. Шъобж зэфэшъхьафхэр иIэу ар сымэджэщым нагъэсыгъ.

Теуцожь районым щыщ хъулъфыгъэу илъэс 26-рэ зыныбжьыр Адыгэкъалэ пэмычыжьэу гъогум щыдэчъэхыгъ, иавтомобили зэпыригъэзагъ. Водителыри ащ къыдисыгъэри Адыгэкъалэ исымэджэщ нагъэсыгъэх.

Тыгъурыгъой пэмычыжьэу аварие къыщыхъугъ. Тэхъутэмы­къое районым щыщ хъулъфыгъэу илъэс 26-рэ зыныбжьыр зэрысыгъэ автомобиль псынкIэр къыготэу кIощтыгъэ хьылъэзещэ машинэм еутэкIыгъ. Автомобиль псынкIэм исыгъэ пассажирэу шъобж зэфэшъхьафхэр зытещагъэ хъугъэр сымэджэщым нагъэсыгъ. Мыекъопэ районым игъогухэми хъугъэ-шIэгъитIу атехъухьагъ. Ахэм зи ахэкIодагъэп.

Къэралыгъо автоинспекцием къызэритыгъэмкIэ, зэпэблэгъащэу зэрэкIохэрэм аварии 5-р апкъ къикIыгъ, гъогогъуиплIэ гъогухэм адэхыгъэх. Мы мафэхэм гъогурыкIонымкIэ шапхъэхэр гъогогъу 398-рэ аукъуагъэу къыхагъэщыгъ.

Ешъуагъэхэу транспортыр зэрэзэрафагъэм пае нэбгыри 7 агъэпщынагъ. Амыгъэнэфэгъэ чIыпIэхэм гъогур зэрэщызэпачыгъэм пае лъэсрыкIо 24-мэ административнэ протокол афызэхагъэуцуагъ.

Адыгеим и Къэралыгъо автоинспецие водительхэми, лъэсрыкIохэми агу къегъэкIыжьы гъогурыкIонымкIэ шапхъэхэр дэх имыIэу зэрагъэцэкIэн фаер. Чэщрэ ары анахьэу гъогухэм защысакъынхэ фаер.

АР-м хэгъэгу кIоцI IофхэмкIэ и Министерствэ ипресс-къулыкъу