Гъэмэфэ мэфэ жъоркъхэм защиухъумэным екIолIэкIэ зэфэшъхьаф нэбгырэ пэпчъ къыфегъоты.

Щаим, кофем, псы IэшIум анэмыкIэу мафэм псы литрэрэ ныкъорэ цIыфым ришъун фаеу ары. Сыда пIомэ псым цIыфым ыпкъышъол мыхъунэу хэлъ токсинхэр къыхегъэкIых. Ау къэIогъэн фае псы бащэр зыгу ыкIи зижъэжъые узхэрэмкIэ щына­гъоу зэрэщытыр. Арышъ, ахэр зыфэ­сакъыжъынхэ фае.

Псыр цIыфым ыпкъышъол ищыкIэгъэ дэдэу щыт, ащ ипчъа­гъэ процент 50 — 80 хъун фае. ЦIыфыр нахь ныбжьыкIэ къэс, ыпкъышъол псы нахьыбэ хэт, сабыим псэу хэтыр процент 80 мэхъу. Ныбжьыр нахь хэкIуатэ къэс пкъышъолым хэт псым къыщэкIэ. Ащ къыхэкIэу пкъы­шъолым шIоеу хэлъыр нахьыбэ мэхъу ыкIи цIыфыр сымэджэнэу регъажьэ.

Гъэмэфэ фабэм пкIантIэм хэтэу псы бащэ цIыфым къы­хэкIы. Бзылъфыгъэхэм анахьи хъулъфыгъэхэр ары зыпкъышъол псыр нахьыбэу къызыхэкIырэр.

ШIэныгъэлэжьхэм зэрагъэунэфыгъэмкIэ, псы стэчан пчъа­гъэу цIыфым мафэм ришъурэм онкологие узыр къемыузыныр проценти 7-кIэ нахь макIэ ешIы. «КIэлэеджакIом «5» нэмыкI къымыхьынэу шъуфаемэ, мафэм псы стэчани 8 фэдиз ежъу­гъашъу», аIо ахэм.

ЕтIани псэу узашъорэр зы­фэдэми мэхьанэшхо иI. Псы­хъохэм, псынэкIэчъхэм япс минеральнэ щыгъухэр, газхэр ыкIи нэмыкI Iэзэгъу химическэ элементхэу цIыфым ищыкIагъэ­хэр ахэлъых. Литритф зэрыфэрэ бэшэрэбхэу тучанхэм ащащэхэрэм арыт псыр «лIагъэкIэ» алъытэ. Арышъ, непэ чIыопс къэкIуапIэхэм къатырэ псыр цIыфым ипсауныгъэкIэ нахьы­шIоу зэрэщытым щэч хэлъэп.

КIарэ Фатим.