МашIом лые къышъуимыхыным пае
БлэкIыгъэ зыгъэпсэфыгъо мафэхэм Мыекъуапэ ичъыгхэтэлэжьыпIэу «Красноречьем» къыщыкIырэ уцыжъ гъугъэхэм машIо къакIэнэгъагъ.
ЧIыпIэ мэшIогъэкIосэ гарнизоным идежурнэхэр тхьамыкIагъо къызыщыхъугъэ чIыпIэм псынкIэу нэсыгъэх. МэшIогъэкIуасэхэм ищыкIэгъэ амалхэр зэрэзэрахьагъэм фэшI машIом игъогупэ пабзыкIын алъэкIыгъ. Лыгъэм унэхэми, псэуалъэхэми заридзыгъэп. ПстэумкIи квадрат метрэ 650-мэ ащ лые арихыгъ.
Адыгеим ошIэ-дэмышIэ IофхэмкIэ и Министерствэ шъугу къегъэкIыжьы дунаир лъэшэу къызэрэфабэрэм епхыгъэу уцыжъ, къамыл гъугъэхэм нахьыбэрэ машIо къакIанэ зэрэхъугъэр. НахьыбэрэмкIэ цIыфхэр ары тхьамыкIагъор зыпкъ къикIырэр. Ахэм машIохэр ашIы, хэкIхэр, гъогу напцэхэми чIыпIэ нэкIхэми уцхэр ащагъэсты. МэшIогъэкIосэ къулыкъухэм яподразделениехэм уцыжъхэм къакIэнэгъэ машIор загъэкIосэжьырэ лъэхъаным чIыпIэ горэм мэшIошхом зыкъыщиштэн ыкIи цIыфхэм ящыIэныгъэ щынэгъуапIэ ригъэуцон зэрилъэкIыщтыр зыщышъумыгъэгъупш.