ХэушъхьафыкIыгъэ дзэ операцием хэлэжьэрэ къэзэкъ-дзэкIолIхэу джыдэдэм зыгъэпсэфыгъо щыIэхэр дзэ-пат­риотическэ клубэу «Застава» зыфиIорэм ихьэкIагъэх.

Юрэрэ Сергейрэ зыхэлэжьэгъэхэ дзэ опера­циехэм, ащ тидзэкIолIхэм лIыгъэу щызэрахьэхэрэм афэгъэхьыгъэ къэбархэр ныбжьыкIэхэм къафаIо­тагъ, топхэр зыхэт расчетыр зэрагъэIорышIэрэм къытегущыIагъэх. Къэзэкъ ныбжьыкIэхэм я Союз итхьаматэ илъэIукIэ лIыгъэшIэпIэ чIыпIэу дзэкIолI­хэм язырэр зэрыфэгъа­гъэр къыIотагъ.

«Топ расчетэу дгъэIорышIэрэм къеохи, нэбгыритIу къаукIыгъ. Сэ синасып къыхьыгъ. МетрищкIэ къыспэчыжьэу къэогъэ пкъыгъом шъобжхэр къыс­трищагъэх: сшхьэ, слъэгуан­джэ, сыбг уIагъэхэр фи­шIыгъэх. Тикомандир уIэгъэ хьылъэхэр фэхъугъэу щылъыгъ, ар а чIыпIэм къыIуслъэшъужьыгъ, ау нэмыкI дзэкIолIэу щылъы­гъэхэм зыпарэкIи уаде­Iэжьышъунэу щытыгъэп, сэри ащ фэдиз кIуачIэ сиIэжьыгъэп… Тимашинэ­хэр зырызэу сыуплъэкIугъэх, ахэр къызэхэнэжьыщтыгъэхэп, рациехэм Iоф ашIэжьыщтыгъэп. Симашинэ секIолIэжьи, ерагъэу зызэхэсэгъэнэжьым, топыщэхэр къытефагъэх. Къаорэр нахь макIэ зэ­хъум машинэм сыкъипкIи, кIалэхэр къызщызгъэнэгъэ чIыпIэм зэрэсфэлъэкIэу сыкъэчъэжьыгъ. Ахэр псаоу сыкъэкIожьыным щыгугъыгъэхэп. Пстэури зэIэсэжьым тидокументхэр, координатхэр зэрыт блокнотхэр, телефонхэр къэсшыпыжьыгъэх. Машинэр къыIузгъахьи, кIа­лэхэр къислъэшъожьыгъэх. Тиехэм тазэрэIукIэжьыщт гъогум тытехьагъ. Маши­нэр сфыфэ зытIо-зыщэ рулым сыIумэхыхьагъ, ау етIани сиакъыл къэкIожьыщтыгъ. Тинасыпти, лъэмы­джыр къагъэуагъэп, тилъэ­сыдзэхэр къызысэлъэгъу­хэм газыр къэстIупщыгъ. Тормозым Iоф ышIэжьыщтыгъэп, машинэр ежь­-ежьы­рэу шъоф гузэгум къыщыуцугъ. Машинап­чъэр къыIусхи ащ сыкъызэризыгъэр, тидзэкIолIэу маши­нэм къечъэлIагъэхэм сы­къызэраубытыгъэр ары аужырэу къэсшIэжьырэр…»

Непэрэ мафэм илIы­хъужъхэм дзэкIолI шъыпкъагъэу, зэкъошыныгъэу ахэлъым ищысэтехыпIэ инэу зэхахыгъэр ныбжьыкIэхэм къащыхъугъ. ЛIэныгъэм пэблагъэу щытыгъэ лIыхъужъхэм зыкIыныгъэр, зэкъотныгъэр, лIыгъэр къызхагъэфагъ. ЛIыхъужъхэм сымэджэщым щяIэзагъэх ыкIи непэ зэуапIэм Iухьажьыгъэхэр, тикъэралыгъо игъунапкъэ­хэм якъэухъумэн пы­зыублэжьыгъэхэр ахэм ­ахэтых.

Непэрэ мафэм илIы­хъужъэу Сергей сабыих иI. НыбжьыкIэхэм яхэ­гъэгу шIу алъэгъунэу, фэшъыпкъэнхэу къяджагъ: «На­хьыжъхэм шъуядэIу, лъы­тэныгъэ зэфэшъушI, пат­риотэу шъущыт! Шъуикъэ­ралыгъо, шъуиунэ, шъуиунагъо къэшъуухъумэнхэм шъуфэхьазырын фае!»

ЗэIукIэм икIэух кIалэхэм лIыхъужъ-дзэкIолIхэм ягъу­сэхэу сурэтхэр зытырахыгъэх. Къэзэкъ ныбжьыкIэ­хэм я Союз илIыкIохэр «Своих не бросаем» зыфиIорэ Iофтхьабзэм гуманитар IэпыIэгъухэм, дзэ­кIолIхэм афатхырэ письмэ­хэм язэхэщэн чанэу ахэлажьэх.

Екатерина Загорулько.