Лъэпкъ проектэу «Демографием» ишIуагъэкIэ Адыгеим икъоджэ псэупIэхэм псэолъакIэхэр ащагъэпсых.

Хьатыгъужъыкъое къо­джэ псэупIэм ипащэу Къэ­рэшэе Асхьад чылэм итеплъэ нахьышIу зэры­хъущтым фэбанэ.

Лъэпкъ проектэу «Демографием» ишIуагъэкIэ къоджэ псэупIэхэм псэуа­лъэхэр ащагъэпсых. Пщы­чэу — кIэлэцIыкIу IыгъыпIэ, Хьатыгъужъыкъуае — культурэм и Унэ аща­шIынэу мылъку къафатIупщыгъ. Къэрэшэе Асхьад тызэрэщигъэгъозагъэмкIэ, псэолъакIэхэм япроектхэр аужырэ шапхъэхэм ади­штэу гъэпсыгъэх.

КIэлэцIыкIу IыгъыпIэм ишIын ыкIэм нэсыгъ, къа­титIоу зэтет унэм коммуникациехэр ращэлIагъэх. Псэуалъэм изэтегъэпсы­хьан сомэ миллион 253-рэ пэIуагъэхьагъ.

КIэлэцIыкIу IыгъыпIэр нэбгыри 120-мэ ателъытагъ.

КIэлэцIыкIу IыгъыпIэу «Дэхэбын» зыфиIорэм ипащэу БлэнэгъэпцIэ Сусанэ къытфиIотагъ:

«Учреждениеу тызчIэсыгъэр цIыкIу, жъы хъугъэ. Лъэпкъ проектым ишIуагъэкIэ тикъоджэ псэупIэ кIэлэцIыкIу IыгъыпIэ щашIы. КъатитIу хъурэ псэолъакIэр шэпхъакIэмэ адештэ. Психологымрэ логопедымрэ зыщылэжьэщтхэ кабинетхэр дгъэнэфагъэх. ГущыIэныр къыз­фэкъинхэм игъэкIотыгъэу Iоф адашIэнымкIэ амалышIухэр яIэ хъущт. Сэкъатныгъэ зиIэ сабый­хэри тштэнхэм тыфэхьазыр. КIымэфэ чъыгхатэ (зимний сад) кIэлэцIыкIумэ афэдгъэпсыщт. Адыгэ лъэп­къым фэгъэхьыгъэ музей кIэлэцIыкIу IыгъыпIэм хэтынэу итхъухьагъ, лъэпкъым итарихъ сабыймэ къафэтIотэщт».

Учреждением ищагу куп пэпчъ зыщыджэгун чIыпIэ иI, жьаур къэзышIырэ бгъагъэхэр лъагэх, лъэс­рыкIо гъогухэр ашIыгъэх. Бжыхьэм чъыг 200 щагум дагъэтIысхьащт.

«Къуаджэм изытет Iэ­рыфэгъоу гъэпсыгъэным тыдэлажьэ, — къытфиIотагъ Асхьад. — НыбжьыкIэхэм зызщагъэпсэфын алъэкIыщт чIыпIэхэр афэдгъэпсыным тыпылъ. Культурэм и Унэ ишIын пэIуд­гъэхьанэу сомэ миллион 69-рэ къытфатIупщыгъ, бжыхьэм ехъулIэу ар хьа­зыры хъунэу тыщэгугъы. Аужырэ шапхъэхэм ади­штэу псэолъакIэр зэты­рагъэпсыхьэ. Унэр ины, лъагэ, гуIэтыпI, ыкIоцI гъэ­шIэгъонэу зэтеутыгъ, тIысыпIэ 215-рэ иI. Ащ фильмэ зэфэшъхьафхэр къыщыдгъэлъэгъощтых, зэIукIэхэр, концертхэр, мэ­­фэкIхэр, Iофтхьабзэхэр щызэхэтщэщтых».

Тхылъ еджапIэр, хъарзынэщыр зычIэтыщтыр, нэмыкIхэр культурэм и Унэ хэтыщтых.

Мыщ фэдэ лъэпкъ проектхэм яшIогъэшхо къызэрэкIорэр къоджэдэсхэм къыхагъэщы, япсэупIэ нахь кIэракIэ зэрэхъурэм рэгушIох, рэгушхох.

Лъэпшъыкъо Фатим.

Сурэтхэр: А. Iэшъын.