Гъэстыныпхъэ шхъуантIэр алъыгъэIэсы­жьыгъэ­ным­кIэ социальнэ программэу щыIэм хэлэ­жьэнхэу лъэIу тхылъ мин 985-рэ къатыгъ, ар къыIопщыгъ партиеу «Единэ Россием» и Генеральнэ Совет исекретарэу Андрей Турчак.

ЛъэIу тхылъхэм япчъагъэ миллионым нэсынкIэ бэп къэнагъэр. Ащ псынкIэу къызэрэхахъо­­рэр къыдэплъытэмэ, шы­шъхьэ­Iу мазэм блэмыкIэу ащи ты­шъ­хьэ­дэкIынкIэ енэгуягъо. Бэ­дзэ­о­гъу мазэм ащ мин 21-рэ ащ къы­хэхъуагъ, ыпкIэ хэмылъэу нэ­б­гырэ мин 642-мэ газыр афыра­щагъэу щытыгъэмэ, бэдзэ­огъум а пчъагъэр мин 36-кIэ нахьыбэ хъугъэ. Хэхъоныгъэхэр тиIэх, ау ар гъунапкъэп, — къыIуагъ ащ.

Андрей Турчак къызэрэхигъэщыгъэмкIэ, гъэмафэр къызи­хьагъэм щегъэжьагъэу партиеу «Единая Россием» хэтхэмрэ «Газпромым» илIыкIохэмрэ зэгъусэхэу шъолъырхэм, къоджэ псэупIэхэм зэIукIэхэр ащызэхащэх, гъэстыныпхъэ шхъуантIэм шIуагъэу къафихьыщтыр зыфэдэр къафаIуатэ, фэгъэкIотэныгъэу яIэхэми ащагъэгъуазэх.

«Ащ фэдэ зэIукIэхэм ауж лъэ­Iу тхылъэу къатыхэрэр на­хьыбэ мэхъу», — къыкIигъэт­хъыгъ Андрей Турчак.

«БлэкIыгъэ тхьамафэм УФ-м и Президент хэбзэгъэуцугъэу зыкIэтхэжьыгъэм къыделъытэ гъэстыныпхъэ шхъуантIэр зыгощырэ компаниехэм газыр къызычIащырэ чIыпIэхэр приватизацие ашIышъунхэу. Программэр зэрифэшъуашэу гъэцэкIэгъэнымкIэ ар мэхьанэшхо зиIэ лъэбэкъу. Ау гумэкIыгъохэр джыри щыIэх, — къыIуагъ Андрей Турчак.

Газ оборудованиер зыщэфыгъэхэм ащ пэIуагъэхьэгъэ мылъкур афызэкIэгъэкIожьыгъэным иIофыгъуи пащэр къыщыуцугъ.

Вице-премьерэу Александр Новак зэхэсыгъом зэфэхьысыжь къыфишIыгъ ыкIи пшъэрылъ афишIыгъ мылъкум икъегъэгъэзэжьынкIэ фэгъэкIотэныгъэу яIэр цIыфмэ афаIопщызэ ашIынэу. Шъолъыр 69-мэ мы лъэныкъомкIэ IэпыIэгъу ащафэхъух, анахьэу сэкъатныгъэ зиIэхэм, пенсионерхэм, сэкъатныгъэ зиIэ сабый­хэр зэрыс унагъохэм, IофшIэным­кIэ ветеранхэм яшIуагъэ ара­гъэ­кIы. «Гъэстыныпхъэ шхъуантIэр алъыгъэIэсыгъэнымкIэ социальнэ программэу щыIэр игъорыгъоу тэгъэцакIэ. ПсэупIэхэу газыр зэ­­ращэн фаехэу, ау ушъхьагъу зэфэшъхьафхэм апкъ къикIэу лъэIу тхылъыр къэзымытыгъэхэм Iоф адэшIэгъэн фае. Социальнэ фэгъэкIотэныгъэу яIэм диштэу цIыфхэм IэпыIэгъу агъотымэ, газыр зыгъэфедэрэмэ япчъагъэ хэпшIыкIэу нахьыбэ хъущт»,— къыхигъэщыгъ вице-премь­ерым.

Мы социальнэ программэм игъэцэкIэн Адыгеим щылъагъэ­кIуатэ. Республикэм и ЛIышъхьэу, партиеу «Единэ Россием» ишъо­лъыр къутамэ и Секретарэу КъумпIыл Мурат мы Iофыгъом ынаIэ тет. Гъэстыныпхъэ шхъуан­тIэр алъыгъэIэсыгъэным фыте­гъэпсыхьэгъэ социальнэ программэу щыIэм ишIуагъэкIэ респуб­ликэм зэзэгъыныгъэ минибл щы­­кIэтхагъэх, псэупIэ 4450-мэ ягъунапкъэмэ газыр аращэлIэгъ, 1700-мэ афыращагъ.

КъумпIыл Мурат шъолъыр штабым унашъо фишIыгъ программэм игъэцэкIэнкIэ гъэхъагъэу ашIыгъэхэм къащымыуцунхэу, джыри хагъэхъонэу. А про­граммэм ухэлэжьэныр зэрэ­псынкIэр цIыфхэм агурыгъэIогъэ­ныр ары джырэкIэ анахь пшъэ­рылъ шъхьаIэу къэуцурэр.

Джащ пае лъэIу тхылъыр гази­фикацием и ЗыкI оператор исайт, «Газпром газораспределение Мыекъуапэ» зыфиIорэ компанием исайт, порталэу «Госуслуги» арыбгъэхьан е МФЦ-м игупчэу «Мои документы» зыфиIорэм ептымэ хъущт.

Шъугу къэдгъэкIыжьын, мы Iофыгъом фэгъэхьыгъэ хэбзэгъэу­цугъэм зэхъокIыныгъэхэр фэзы­шIыгъэр фракциеу «Единэ Россиер» ары. Урысыем и Президентэу Владимир Путиныр 2021-рэ илъэ­сым ащ кIэтхэжьыгъ.

Джащ фэдэу партием предложение къыхьыгъ фэгъэкIотэныгъэ зиIэ цIыфхэу гъэстыныпхъэ шхъуан­тIэр зыфыращэхэрэм япчъагъэ зырагъэушъомбгъунэу, ар зэрэхэгъэгоу щагъэцэкIэнэу.