Адыгэ щаим икъэбар цIыфхэм зызэлъашIагъэр бэшIагъэ. Ар анахь щай дэгъоу щыIэхэм ахалъытэ, IэкIэ къаугъои.

Урысыем шIэныгъэхэмкIэ и Академие (РАН) иунашъокIэ республикэм ичIыгухэу щаир къызщагъэкIыхэрэм ячIышъхьашъо изытет зыфэдэр ауплъэкIугъ.

Щаим икъэгъэкIын тегъэ­псыхьэгъэ чIыгур тэрэзэу къы­зэрэхэпхырэм идэгъугъи, илъэс пчъагъэу къызэрэ­кIыщтыри елъытыгъэх.

Специалистхэм чIыпIэ зэ­фэшъхьафхэм къащаугъоигъэ чIышъхьашъохэм язытет ауплъэ­кIущтых, агрохимическэ ушэтынхэр ашIыщтых.

Щай плантациехэр Мыекъопэ районыр ары зыдэщыIэхэр. Апэрэ щай лъапсэхэр 1938-рэ илъэсым агъэтIысыгъагъэх. Щаир къызщагъэкIыщт чIыпIэр зэрэдунаеу щызэлъашIэрэ шIэ­ныгъэлэжьэу Николай Вавиловым къыхихыгъагъ.

Къыблэ лъэныкъом щыIэ культурэхэр нэмыкI чIыпIэхэми къащыбгъэкIын плъэкIыщтмэ зыщауплъэкIурэ лабораториеу Шъачэ дэтым иIофышIэхэу Ти­на Бесединамрэ Циала Тут­беридзерэ къызэраIуагъэмкIэ, Адыгеим къыщаугъоигъэ чIы­шъхьашъор зэрауплъэкIурэр плантациякIэхэм якъэгъэкIын­кIэ апэрэ лъэбэкъоу хъугъэ.

Адыгеим плантациякIэу щагъэпсыщтым Субтропическэ научнэ гупчэм къыщагъэкIыгъэ щай лъэпкъ зэфэшъхьафхэм афэдэх щагъэтIысыщтхэр.