Урысые Федерацием и Президентэу Вла­димир Путиным пшъэрылъ къызэра­фишIы­гъэм тетэу гурыт еджапIэхэм зы сменэкIэ ащегъэджэгъэнхэм епхыгъэ Iофыгъохэр игъо­рыгъоу Адыгеим щызэшIуахых.

Федеральнэ мылъкукIэ гурыт еджапIэхэм гъэцэкIэжьын Iоф­шIэнхэр арашIылIэх, гъэсэныгъэ языгъэгъотырэ организациехэм апае унакIэхэр агъэпсых. Зи­псауныгъэкIэ щыкIагъэ зиIэ кIэ­лэцIыкIухэм яегъэджэнкIэ амал дэгъухэр щыIэнхэм лъэшэу анаIэ тырагъэты. МыщкIэ ны­-тыхэми, общественнэ организациехэми яшIошIхэр къыда­лъытэ.

Адыгеим и ЛIышъхьэу КъумпIыл Мурат зипсауныгъэ пыч фэхъугъэ кIэлэцIыкIухэм ате­гъэпсыхьэгъэ гурыт еджапIэу Мыекъуапэ дэтым щыIагъ. Еджа­пIэм иадминистрацие, ны-ты- хэм, сэкъатныгъэ зиIэ кIэлэцIыкIухэм янэ-ятэхэм я Урысые организацие, республикэм ипро­куратурэ ялIыкIохэм аIукIагъ. Зы сменэкIэ кIэлэцIыкIухэр егъэ­джэгъэнхэм епхыгъэ Iофыгъом изэшIохынкIэ амалэу щы­Iэхэм мыщ щатегущыIагъэх.

ЗэIукIэм хэлэжьагъэх АР-м ипрокурорэу Игорь Шевченкэр, АР-м иминистрэхэм я Кабинет и Тхьаматэу КIэрэщэ Анзаур, АР-м гъэсэныгъэмрэ шIэны­гъэмрэкIэ иминистрэ ипшъэ­рылъхэр зыгъэцакIэу Евгений Лебедевыр, Мыекъуапэ имэрэу Геннадий Митрофановыр.

«ЦIыфхэм ятхылъхэм Iоф адэтэшIэ, Iофыгъохэр игъорыгъоу зэшIотэхых. КIэлэцIыкIухэм япIун, япсауныгъэ гъэпытэгъэным, гъэсэныгъэ дэгъу ягъэ­гъотыгъэным сыдигъуи апшъэрэ мэхьанэ ятэты. ЗипсауныгъэкIэ щыкIагъэ зиIэ кIэлэцIыкIухэм атегъэпсыхьэгъэ еджапIэу Мые­къуапэ дэтым IэпыIэгъу тыфэ­хъунэу итхъухьагъ. Ны-тыхэри, гурыт еджапIэм икIэлэегъаджэ­хэри тигъусэхэу пшъэрылъхэм язэшIохын тишъыпкъэу тыдэлэжьэщт», — къыIуагъ КъумпIыл Мурат.

Адыгеим и ЛIышъхьэ зэрэхигъэунэфыкIыгъэмкIэ, къихьащт илъэсым гурыт еджапIэм игъэцэкIэжьын ыуж ихьащтых. Еджа­пIэм ипроект-сметэ документацие игъэхьазырынкIэ пшъэ­рылъхэр зэIукIэм щафишIыгъэх.

Мастерскойхэр гурыт еджапIэм инэмыкI унэ ахьынхэу рахъухьэ. КъаунэкIырэ чIыпIэхэр кабинеткIэ къызфагъэфедэщтых. Псау­ныгъэр зыщагъэпытэрэ физ­культурэ комплекси ащ къыготэу агъэпсын ямурад. КъумпIыл Мурат Мыекъуапэ имэрие лъэс гъогум ишIынкIэ, гурыт еджапIэм ищагу изэтегъэпсыхьанкIэ, къэгъагъэхэмрэ чъыгхэмрэ ащ щыгъэтIысхьэгъэнхэмкIэ пшъэ­рылъ гъэнэфагъэхэр фишIыгъэх.

«КIэлэцIыкIухэм гурыт еджапIэхэм охътабэ ащагъакIо. Гъэ­сэныгъэ дэгъурэ шIэныгъэ куурэ кIэлэцIыкIухэм ягъэгъотыгъэным яшъыпкъэу зэрэдэлажьэхэрэм нэмыкIэу, гъэсэныгъэ языгъэгъотырэ организациехэр Iэры­фэгъоу щытынхэми фэгумэкIынхэ фае. Джащыгъум еджэным нахь егугъущтых. Зипсауныгъэ­кIэ щыкIагъэ зиIэ кIэлэцIыкIу­хэ­ми ар афэгъэхьыгъ», — къы­Iуагъ республикэм и ЛIы­шъхьэ.

Зипсауныгъэ пыч фэхъугъэ кIэлэцIыкIухэм атегъэпсыхьэгъэ еджапIэм ипащэу Ирина Нес­теренкэмрэ сэкъатныгъэ зиIэ кIэлэцIыкIухэм янэ-ятэхэм я Урысые общественнэ организацие ишъолъыр къутамэ итхьаматэу Анна

Раудрэ КъумпIыл Мурат зэрэфэразэхэр къаIуагъ сэкъатныгъэ зиIэ кIэлэцIыкIухэр зэрыс унагъохэм IэпыIэгъу ягъэгъотыгъэным епхыгъэ Iофыгъохэм язэшIохынкIэ IэпыIэгъу къызэрафэхъурэм фэшI.

АР-м и ЛIышъхьэ ипресс-къулыкъу Сурэтхэр: А. Гусев.