Мыекъопэ къэралыгъо технологическэ университетым мы мафэхэм гъэсэныгъэ медицинэ кластерэу «ПрофиМед» зыфиIорэр къыщызэIуахыгъ.

Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустемрэ Мыекъопэ къэралыгъо технологическэ университетым иректорэу Къуижъ Саидэрэ мы лъэныкъомкIэ зэрэзэдэлэжьэщтхэр къэзыушыхьатырэ тхылъым зэдыкIэтхагъэх.

Iофтхьабзэм хэлэжьагъэх АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Пэрэныкъо Сусаннэ, Мыекъопэ медицинэ колледжым ипащэу Алексей Самокритовыр, Мыекъопэ къэралы­гъо технологическэ университетым егъэджэн IофымкIэ ипроректорэу Людмила Задорожнаяр, медицинэ институтым ипащэу НэмытIэкъо Хьазрэт, мы апшъэрэ еджапIэм иполитехническэ колледж идиректорэу ХъутIыжъ Заурбэч, деканхэу Артур Арутюновыр, Шэуджэн Вячеслав, Бислъангъур Заремэ, нэмыкIхэри.

Мыекъопэ къэралыгъо технологическэ университетым зэнэкъокъум текIоныгъэ къызэрэщыдихыгъэм бэдзэогъум иапэрэ мафэхэм къэнэфагъ. Грантэу къыфагъэшъошагъэм ишIуагъэкIэ 2024-рэ илъэсым гурыт сэнэхьат зыщарагъэгъотырэ гъэсэныгъэ учреждениехэм Iэпы­Iэгъу афэхъущтых. Федеральнэ проектэу «Профессионалитет» зыфиIорэм ар къыдыхэлъытагъ.

Грантым ишIуагъэкIэ гъэсэныгъэ кластерэу «ПрофиМед» зыфиIорэр зэхащэщт. АР-м гъэсэныгъэмрэ шIэныгъэмрэкIэ и Министерствэ ар игукъэкI. Мыекъо­пэ къэралыгъо технологическэ университетым субсидиеу сомэ миллион 60,5-рэ къыфагъэшъошагъ.

АР-м гъэсэныгъэмрэ шIэныгъэмрэкIэ и Министерствэ, псауныгъэр къэухъумэгъэнымкIэ Министерствэр, гъэсэныгъэ организации 3 ыкIи псауныгъэр къэухъу­мэгъэнымкIэ организацие I 2 кластерым хэхьащтых. «Врачхэм я Хас» зыфиIорэм илIыкIохэм ыкIи сымэ­джэщхэм яIофышIэхэм, нэмыкI специалистхэм егъэ­джэнхэр зэхащэщтых.

«ПрофиМед» зыфиIорэм къыдыхэлъытагъэу шъо­лъырым имедицинэ организациехэм яIофышIэхэм яшIэныгъэхэм ахагъэхъощт, нэмыкI лъэныкъохэм афырагъэджэщтых, гурыт сэнэхьат зэзыгъэгъотыгъэ­хэм ушэтынхэр афызэхащэщтых, гъэсэныгъэ организациехэм методическэ IэпыIэгъу арагъэкIыщт. Грантым ишIуагъэкIэ аужырэ шапхъэхэм адиштэрэ Iэмэ-псымэ зэфэшъхьафхэр ащэфыщтых ыкIи гурыт сэнэхьат гъэсэныгъэ зыщарагъэгъотырэ еджэпIэ класси 7-р: «Акушерское дело», «Лечебное дело», «Фармация», «Лабораторная диагностика», «Сестринское дело» зыфиIорэ лъэныкъохэмкIэ зэтырагъэпсыхьащтых.

Илъэсищым къыкIоцI программэм нэбгырэ минищым ехъу хагъэлэжьэнэу агъэнафэ. Ащ ишIуагъэкIэ студентхэм лъэныкъо зэфэшъхьафхэмкIэ шIэныгъэ куухэр зэрагъэгъотыщт, аужырэ технологиехэм адиштэрэ Iэмэ-псымакIэхэм ягъэфедэн аIэкIэхьащт.

Мыекъопэ къэралыгъо технологическэ университетым ипресс-къулыкъу