Апшъэрэ еджапIэхэм Iоф зэдашIэщт
Мыекъопэ къэралыгъо технологическэ университетымрэ Краснодарскэ апшъэрэ дзэ училищэу генералэу С.М. Штеменкэм ыцIэ зыхьырэмрэ зэгъусэхэу шIэныгъэ ушэтынхэр зэхащэщтых, дзэ техникэм иамалхэр ауплъэкIущтых.
ШIэныгъэ-техническэ зэдэлэжьэныгъэм фэгъэхьыгъэ зэзэгъыныгъэм апшъэрэ еджапIэхэр мэфэкI шIыкIэм тетэу зэдыкIэтхагъэх, ащ фэгъэхьыгъэ зэхахьэр къалэу Краснодар щыкIуагъ.
Апшъэрэ дзэ училищым ипащэу, генерал-майорэу Игорь Шпырня ыкIи Мыекъопэ къэралыгъо технологическэ университетым иректорэу Къуижъ Саидэ аIапэхэр документым кIадзагъэх.
Зэзэгъыныгъэм ишIуагъэкIэ апшъэрэ еджапIэхэм зы екIолIакIэ зэдыряIэу IэшIыгъэ научнэ-техническэ ушэтынхэр ашIыщтых, инновационнэ технологиехэр агъэфедэщтых, къэбарыр щынэгъончъэнымкIэ ыкIи къэухъумэгъэнымкIэ шIыкIэу щыIэхэр агъэкIэжьыщтых, шIэныгъэ-ушэтын ыкIи опытнэ-конструкторскэ IофшIэнхэм ахэлэжьэщтых. Джащ фэдэу бгъуитIумэ хэушъхьафыкIыгъэ дзэ техникакIэхэр ауплъэкIущт, ахэм афэгъэхьыгъэ аналитическэ документациер агъэхьазырыщт, шIэныгъэ-техническэ ушэтынхэри ежьхэм ашIыщтых. Зэзэгъыныгъэм пIэлъэ гъэнэфагъэ иIэу щытэп.
ТапэкIэ мыщ фэдэ зэзэгъыныгъэ МКъТУ-м адишIыгъагъ Адыгеим и Дзэ комиссариат, Краснодарскэ апшъэрэ дзэ авиационнэ училищэу Советскэ Союзым и ЛIыхъужъэу А.К. Серовым ыцIэ зыхьырэм, я 761-рэ егъэджэн авиационнэ полкым, Урысыем и МЧС и ГъэIорышIапIэу Адыгеим щыIэм, АР-м иветеранхэм я Совет, ДОСААФ-м ишъолъыр отделение, Адыгеим икIэлэцIыкIу-ныбжьыкIэ дзэ-патриотическэ общественнэ движениеу «ЮНАРМИЯ» зыфиIорэм.
Шъугу къэдгъэкIыжьын, МКъТУ-м дзэ егъэджэн гупчэ щызэхэщэгъэныр зигукъэкIыгъэр АР-м и ЛIышъхьэу КъумпIыл Мурат ары. Мы илъэсым игъэтхэпэ мазэ УФ-м зыкъэухъумэжьыгъэнымкIэ и Министерствэ илIыкIохэм заIокIэм, а гухэлъыр къыриIотыкIыгъагъ. Агъэнэфэгъэ пшъэрылъым елъытыгъэу егъэджэн-материальнэ базэр агъэхьазыры.
Мыекъопэ къэралыгъо технологическэ университетым 2023-рэ илъэсым чIахьэхэрэм амал яIэщт Апшъэрэ егъэджэн гупчэм щеджэнхэу. 2024-рэ илъэсым ищылэ мазэ и 1-м къыщыублагъэу Апшъэрэ егъэджэн гупчэм зэнэкъокъу шIыкIэм тетэу студентхэр ыштэщтых. Шапхъэу агъэнэфагъэхэмкIэ апэ рагъэшъыщтхэр дэгъоу еджэхэрэр, физическэ амалышIухэр зиIэхэр, медицинэ уплъэкIунхэм апхырыкIхэрэр ары. Ащ чIафэхэрэр бюджет мылъкукIэ еджэщтых.
ЕджапIэр къэзыухыхэрэм дзэ сэнэхьат къаратыщт ыкIи УФ-м и УIэшыгъэ КIуачIэмэ язапас хагъэхьащтых.