Адыгеим и ЛIышъхьэ къэралыгъо фондэу «Хэгъэгум иухъумакIохэр» зыфиIорэм ирес­публикэ къутамэ зычIэтыщт унэу гъэ­цэкIэжьынхэр зыщыкIорэм щыIагъ.

[caption id="attachment_137087" align="aligncenter" width="800"] Сурэтыр: А. Гусев.[/caption]

Урысые Федерацием и Президентэу Владимир Путиным хэушъхьафыкIыгъэ дзэ операцием хэлажьэхэрэми, ахэм яунагъохэми IэпыIэгъу ягъэ­гъотыгъэнэу пшъэрылъ къызэригъэуцугъэм тетэу мэкъуогъум и 1-м ащ фэдэ къутамэхэм зэрэхэгъэгоу Iоф щашIэу ра­гъэжьагъ.

Шъугу къэтэгъэкIыжьы республикэм ипащэ пшъэрылъ зэрафишIыгъэм тетэу къэралыгъо фондым икъутамэ пае Мые­къуапэ игупчэ унэ хъоо-пщау къызэрэщыхагъэкIыгъэр. КIэлэцIыкIу IэзапIэкIэ агъэфедэщтыгъэм гъэцэкIэжьын IофшIэнхэр джыдэдэм щэкIох. Ахэр аухыфэ нэс къэралыгъо фондым икъутамэ цIыфхэм ясоциальнэ фэIо-фашIэхэр зыгъэцэкIэрэ Гупчэу Мыекъуапэ дэтым чIэтыщт. Район гупчэ пэпчъи къэралыгъо фондым икъутамэ иIофышIэхэр щэлажьэх.

Адыгеим и ЛIышъхьэ гъэцэ­кIэжьын IофшIэнхэр зэрэкIорэм зыщигъэгъозагъ. Унэм иинженер коммуникациехэр, ишъхьаны­гъупчъэхэр, ипчъэхэр зэблахъу­гъэх. ЦIыфхэр зыщырагъэблэгъэщтхэ, нэбгырэ купмэ, кIэлэцIыкIумэ ателъытэгъэ чIыпIэхэр ащ щагъэнэфэщтых. Юридическэ, психологическэ, социальнэ-медицинэ IэпыIэгъу, адаптациемкIэ, реабилитациемкIэ фэIо-фашIэхэр зыщагъэцэкIэщт кабинетхэми ящыкIэгъэ обо­рудованиер арагъэуцощт. Мы илъэсым ичъэпыогъу ыкIэхэм яхъулIэу IофшIэнхэр зэкIэ аухы­нэу псэолъэшIхэм рахъухьэ. Къутамэм иунэ къыпэIулъ чIыпIэм изэтегъэпсыхьанкIэ къалэм иадминистрацие пшъэрылъ гъэнэфагъэхэр фашIыгъэх. ПхъэнтIэкIу кIыхьэхэр, хэкI­идзапIэхэр, остыгъэхэр мыщ щагъэуцущтых, къэгъагъэхэмрэ чъыгхэмрэ щагъэтIысхьащтых.

ХэушъхьафыкIыгъэ дзэ операцием хэлажьэхэрэмрэ ахэм яунагъохэмрэ IэпыIэгъу языгъэ­гъотыщт къэралыгъо фондым ипшъэрылъхэр ыгъэцэкIэнхэмкIэ ищыкIэгъэ амалхэр зехьэгъэнхэм апшъэрэ мэхьанэ ятыгъэн зэрэфаер Адыгеим и ЛIышъхьэ къыхигъэщыгъ.

«Хэгъэгум и Президентэу Владимир Путиным пшъэры­лъэу къыгъэуцугъэхэр тэгъэцакIэх, хэушъхьафыкIыгъэ дзэ операцием хэлажьэхэрэмрэ ахэм яунагъохэмрэ зэрэтфэлъэкIэу IэпыIэгъу ятэгъэгъоты. ЦIыфхэм икъоу яфэIо-фашIэхэр афэгъэцэкIэгъэнхэмкIэ ищыкIагъэр зэкIэ тэшIэ. ТидзэкIолIхэм ашIэн фае ячIыпIэгъухэм къазэрадырагъаштэрэр ыкIи ахэм яуна­гъохэм арысхэр IэпыIэгъунчъэу къызэрамыгъэнэщтхэр», — къы­Iуагъ КъумпIыл Мурат.

Къэралыгъо фондым ирес­публикэ къутамэ ипащэу ПIатIыкъо Аслъан зэрэхигъэунэфыкIыгъэмкIэ, хэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ ящыкIэгъэ IэпыIэгъу ягъэгъотыгъэнымкIэ цIыфхэми, ведомст­вэхэми Iоф зэрадашIэщт шIыкIэр къыхахыгъах. Нэбгырэ 350-рэ фэдизмэ фондым зыкъыфагъэзагъ. Азыныкъо фэдизмэ яIофыгъохэр афызэшIуахыгъ. Ахэм IэпыIэгъу зэфэшъхьаф арагъэгъоты. Заом иветеран зыфиIорэ статусыр къафагъэшъошэнэу, санаториехэм къащяIэзэнхэмкIэ путевкэхэр къаратынэу нэбгырабэмэ закъыфагъэзагъ.

IэпыIэгъу гъэнэфагъэхэр ащ лъыпытэу арагъэгъоты. Ащ пае мафэ къэс специалист зэфэшъхьафхэм: медицинэ психолог­хэм, юристхэм, IофшIэнымкIэ ыкIи социальнэ ухъумэнымкIэ Гупчэм, УФ-м и Социальнэ фонд АР-мкIэ икъу­тамэ, Адыгэ Рес­публикэм щыпсэу­хэрэм Iоф­шIапIэ къа­фэзыгъотырэ Гупчэм, МФЦ-м, УФ-м IофшIэнымкIэ и Министерствэ АР-мкIэ меди­кэ-со­циальнэ экспертизэмкIэ ибюро шъхьаIэ яIофы­шIэ­хэм фондым Iоф щашIэ. Джащ фэдэу фондым хэу­шъхьафыкIыгъэ операцием иветеранхэри об­щест­веннэ проект зэ­фэшъхьаф­хэм ахегъэлажьэх. Хэу­шъхьафы­кIыгъэ дзэ операцием щыфэ­хыгъэхэр ащымыгъупшэнхэм, цIыф­хэм япатриотическэ пIуныгъэ атегъэпсыхьэгъэ Iоф­тхьа­бзэхэр зэхащэх.

Республикэм ипащэ зэрэ­хигъэунэфыкIыгъэмкIэ, хэбзэ къулыкъухэм тапэкIи хэушъхьафыкIыгъэ дзэ операцием хэлажьэхэрэм ящыкIэгъэ IэпыIэгъур арагъэгъотызэ ашIыщт, фондым нахь шIуагъэ къытэу Iоф ышIэнымкIэ ищыкIэгъэ амалхэр зэрахьащтых.

«Фондым зыкъыфэзыгъазэрэ пэпчъ иIофыгъохэр икъоу зэшIуахыным, цIыфхэр агъэрэзэнхэм мэхьанэшхо яI», — къы­Iуагъ КъумпIыл Мурат.

АР-м и ЛIышъхьэ ипресс-къулыкъу