Урысыем и Гупчэ Банк Къыблэ шъолъырымкIэ и ГъэIорышIэпIэ шъхьаIэ и Къутамэу АР-м и Лъэпкъ банк къызэритыгъэмкIэ, Адыге­им иилъэс инфляцие процент 1,8-рэ хъоу мэкъуогъу мазэм къалъытэгъагъ.

Ар Къыблэ Федеральнэ шъолъырым (проценти 3,4-рэ) ыкIи Урысыем зэрэщытэу (проценти 3,2-рэ) япчъагъэхэм анахь макI.

Гъомылапхъэхэм ауасэ зэ­хъокIыныгъэхэр фэзышIыгъэр бэдзэршIыпIэм щыIуагъэкIырэ хэтэрыкIхэмрэ лымрэ нахь макIэ зэрэхъугъэу, шъоущы­гъур нахьыбэу зэращэфырэр ары.

БлэкIыгъэ илъэсым мыщ къыщагъэкIи, къыщаугъоижьыгъэ хэтэрыкI IэпэчIэгъанэу яIа­гъэр заухым, IэкIыбым къы­ращыгъэу мэкIаехэм ате­лъыр нахьыбэ хъугъэ. Ахэр сыдигъокIи нахь лъапIэх. Ащ фэшI картофым, пхъым, чIыплъым ауасэ мэкIэ дэдэу хэ­кIы, къэбаскъэр къэлъэпIагъ. Ау помидорэу тичIыгухэм аща­гъэтIысхьагъэм игъо зэрэхъугъэм ыкIи гъунэгъу шъолъыр­хэм ар нахьыбэу къызэра­ращырэм ишIуагъэкIэ, нахь псынкIэу къэпыутыгъ.

Лым ыуаси макIэу еIыхы. Чэтхъуным пылъ хъызмэтшIапIэу тибэдзэршIыпIэхэм чэты­лыр къязыщалIэхэрэм ащыщ­хэм къатIупщырэм къызэрэщагъэкIагъэр ары ащ ушъхьагъу фэхъугъэр.

Цумпэ зэфэшъхьафэу ти­шъолыр къыщагъэкIыхэрэм ягъо зэхъум шъоущыгъоу щапIэхэм щаIуагъэкIырэм хэ­хъуагъ. Цумпэ къэгъэкIыным зегъэушъомбгъугъэным фытегъэпсыхьэгъэ программэм къыдыхэлъытагъэу грантхэр рес­публикэм щатынхэу зы­рагъа­жьэм, фермерхэр нахь чанэу мы культурэм ыуж ихьа­гъэх. Ары цумпэу республикэм къы­щагъэкIырэм ыкIи щыIуагъэкIырэм зыкIыхэхъуагъэр. ЕтIани, шъоущыгъум ыуасэ ар къэзышIыхэрэм хагъэхъон фи­мытхэу къэралыгъом унашъо къы­зэришIыгъагъэм ипIалъэ мэкъуогъум и 1-м къыщыублагъэу ыухыгъ. Ари ащ ыуасэ дэзгъэкIоягъэхэм ащыщ.

Мыгъомылэпхъэ товархэм ауасэ зыпкъ иуцоным «зиIахь хэзылъхьагъэхэр» автомобиль псынкIэхэр ары. Ахэм ауасэ нахь макIэу хахъо хъугъэ. Санкциехэм апкъ къикIыкIэ, автомобильхэр къэлъэпIэгъагъэх, ау Азием иавтомобилышIхэм къыдагъэкIырэм зырагъэушъомбгъуи, предложениехэр нахьыбэ зэхъухэм, уасэхэм зэрахахъорэм къыщыкIагъ.

Щыгъын къыдэгъэкIыным тихэгъэгу зызэрэщиушъомб­гъурэм ыкIи IэкIыбым къызэрэращыщт шIыкIэхэр зэрэзэтырагъэуцуагъэхэм яшIуа­гъэкIэ ахэм ауаси къеIыхыгъ. «Парфюмер-косметическэ товархэм» ахахьэхэрэм ауасэ зэрэдэкIуаерэри нахь макIэ хъугъэ.

Урысые Банкым ипрогноз­хэмкIэ, 2023-рэ илъэс инфляциер проценти 5 — 5,6-рэ хъущт, къэкIощт 2024-р ары проценти 4-м зынэсыжьыщтыр. Ащ тетэуи нэужым лъыкIотэщт.