Илъэс къэс, мэфэ фабэхэр къызысыкIэ, щэрэхъитIу зыкIэт техни­кэр зыгъэIорышIэхэрэм япчъагъэ бэ мэхъу. Кушъхьэфачъэм имыза­къоу мопедыр, скутерыр, мотоциклэр Iэтахъохэр зыкIэхъопсырэ шIухьафтынэу щыт ыкIи ащ фэщагъэ мэхъух.

Арэу щытми, хэти зыщигъэгъупшэ хъущтэп ахэр щынагъоу зэрэщытхэр, зы сыхьатым километрэ 55 — 60 ялъэшыгъэу ыкIи нахьыбэу чъэнхэ зэ­ралъэкIырэр.

АР-м и Къэралыгъо автоинспекцие къызэрэщаIуагъэмкIэ, мы илъэсым имэзихэу пыкIыгъэм зыныбжь имыкъугъэхэр зыхэфэгъэхэ гъогу хъугъэ-шIэгъэ 18 Адыгеим игъогухэм ащагъэунэфыгъ. Ахэм зы кIэлэцIыкIу ахэкIодагъ, нэбгырэ 20-мэ шъобжхэр атещагъэхэ хъугъэ.

Мопедыр зепфэным пае категориеу М е А1 зыфиIорэм иводитель удостоверениехэр уиIэнэу щыт, уныбжь илъэс 16-м зынэсыкIэ ары тхылъыр къы­зыуатыщтыр. Ау илъэс 14-м къыщегъэжьагъэу автоеджапIэм ущеджэн плъэкIыщт. Мотоциклэр бгъэIорышIэным пае категориеу А1-м (мотоциклэ псынкIэм идвигатель куб. см 125-рэ ыкIи илъэшыгъэ кВт 11 мэхъу) иводитель удостоверение уиIэнэу щыт ыкIи Iэтахъом ыныбжь илъэс 16 икъугъэу щытын фае. ИлъэшыгъэкIэ ыкIи иинагъэкIэ зигугъу къэтшIыгъэ шапхъэхэм мотоциклэр заблэкIыкIэ, кате­гориеу А зыфиIорэм иводитель удостоверениер уиIэнэу щыт, ау мыщ дэжьым ар къыдэпхыным пае уныбжь илъэс 18 хъугъэн фае. Мыщ фэдэ ка­тегориехэр уимыIэхэу зигугъу къэтшIыгъэ техникэр зепфэн уфитэп.

УФ-м административнэ хэу­къоныгъэхэмкIэ и Кодекс къызэригъэнафэу, мотоциклэм ыкIи мопедым иводительхэу гъогурыкIоным ишапхъэхэр зыукъо­хэрэм административнэ пшъэ­дэкIыжь арагъэхьын алъэкIыщт. Iэтахъом ыныбжь илъэс 16 имыкъугъэу ыкIи водитель удостоверениер имыIэу автоинс­пекцием икъулыкъушIэ къызигъэуцукIэ, пшъэдэкIыжьыр ащ янэ-ятэхэм арагъэхьыщт.

Хэукъоныгъэ зэришIыгъэм епхыгъэ къэбарыр зыныбжь имыкъугъэхэм яIофхэмкIэ инспекцием фагъэхьы, тапэкIэ ар учетым хагъэуцон алъэкIыщт, ны-тыхэм пшъэдэкIыжь арагъэ­хьыщт. Административнэ тазырыр сомэ мини 5-м кIэхьащт е хэукъоныгъэу ышIыгъэм елъытыгъэу административнэ тазырэу чэщ-мэфитф хьапс тыралъхьащт.

2023-рэ илъэсыр къызихьагъэм къыщыублагъэу гъогурыкIоныр щынэгъончъэу щытыным ылъэныкъокIэ АР-м щыщ зыныбжь имыкъугъэ 42-мэ административнэ пшъэдэкIыжь арагъэхьыгъ, административнэ про­токол 62-рэ зэхагъэуцуагъ.

Хэукъоныгъэ 30-кIэ уна­шъохэр ашIыгъэх, ахэм ащыщэу Iофи 2-м хьыкумыр ахэплъагъ. Адрэ административнэ материалхэр зыныбжь имыкъугъэхэм яIофхэмкIэ комиссием фагъэ­хьыгъэх.

Iэтахъохэр гъогу хъугъэ-шIагъэхэм зэрахэкIуадэхэрэм лъэ­шэу егъэгумэкIы ыкIи ащ идэгъэзыжьын инэу ынаIэ тет Адыгеим и ЛIышъхьэу КъумпIыл Мурат. Республикэм игъогухэм тхьамыкIагъоу атехъухьагъэхэм, ахэм нахь макIэу цIыфхэр ахэкIодэнхэм, гъогухэр щынэгъончъэнхэм защытегущыIэгъэхэ зэхэсыгъоу бэмышIэу щыIагъэм ащ тхьамэтагъор щызэрихьагъ.

«Мы аужырэ тхьамафэхэм кIэух дэй зыфэхъугъэ тхьамыкIэгъо заулэ гъогухэм къате­хъу­хьагъ. МыщкIэ пшъэдэкIыжь зыхьыхэрэми, чIыпIэхэм япащэ­хэми мы Iофыгъом нахь лъэшэу анаIэ тырагъэтынэу ся­лъэIу.

ТхьамыкIагъохэр зы­пкъ къикIыгъэр зэрагъэшIэн, зэфэхьысыжьхэр ашIын, ахэр къэмыхъунхэмкIэ ищыкIэгъэ амалхэр зэрахьанхэ фае», — къыIуагъ Адыгеим и ЛIышъхьэ.

Зэхэсыгъом къызэрэщаIуа­гъэмкIэ, мы илъэсым иапэрэ кIэлъэныкъо Адыгеим игъогухэм хъугъэ-шIэгъи 190-рэ атехъу­хьагъ. Нэбгырэ 23-рэ ахэм ахэкIодагъ, 227-мэ шъобжхэр атещагъэ хъугъэ. Гъогухэм къа­щыхъугъэ тхьамыкIагъохэм нэ­бгыри 5-кIэ нахь макIэу ахэ­кIодагъ.

Республикэм и ЛIышъхьэ муниципалитетхэм япащэхэмрэ хэбзэухъумэкIо къулыкъухэмрэ пшъэрылъ афишIыгъ ищыкIэгъэ пэшIорыгъэшъ Iофтхьабзэхэр зэрахьанхэу. Мыекъуапэ иадминистрацие пшъэрылъ фа-­ шIыгъ электросамокатхэр къа­лэм зэрэщагъэфедэхэрэм, ахэр прокат зэрашIыхэрэм шэпхъэ икъу хилъхьанэу.

«Тэ­ анахьэу тызпылъын фаер цIыфхэм ящыIэныгъэ къэтыу­хъумэныр ары», — къыIуагъ КъумпIыл Мурат.

Мыекъуапэ иадминистрацие ипресс-къулыкъу къызэриты­гъэмкIэ, къалэм щагъэфедэрэ электросамокатхэм гумэкIыгъоу къапыкIыхэрэм фэгъэхьыгъэу зэхэсыгъо зэхащагъ. Ащ къызэрэщаIуагъэмкIэ, Урысыем хэгъэгу кIоцI IофхэмкIэ и Министерствэ гъогурыкIоныр щы­нэгъончъэнымкIэ иотделэу Мые­къуапэ щыIэм ялIыкIохэр ягъусэу мы лъэныкъомкIэ Iофыгъоу къэуцухэрэр зэшIохыгъэнхэм епхыгъэу документхэр агъэхьазырых.

«ЦIыфхэр бэу зыщызэрэу­гъоирэ мэфэкI мафэхэм къалэм иобщественнэ чIыпIэхэм самокатхэм ягъэфедэн нахь макIэ ащышIыгъэн фае. Унашъоу тшIырэм къыщыдгъэнэфэщт мыщ фэдэ самокатхэр зыщыбгъэ­фе- дэ мыхъущт чIыпIэхэр», — къы­Iуагъ Мыекъопэ къэлэ адми­нистрацием ипащэу Геннадий Митрофановым.

Зэхэсыгъом хэлэжьагъэхэм анаIэ зытырагъэтыгъэр гъогурыкIоным ишапхъэхэр къалэм ащамыукъонхэмкIэ кIэлэцIыкIу­хэм Iофтхьэбзэ зэфэшъхьафхэр адызехьэгъэнхэр ары. Ащ пае еджапIэхэм зэпхыныгъэ адыря­Iэу узыгъэгъозэрэ егъэджэнхэр кIэлэеджакIохэм афызэхэщэгъэн­хэ фаеу алъытагъ. Мыщ дэжьым анаIэ зытырагъэтыгъэр илъэс 14 мыхъугъэ Iэтахъом самокатыр зэрифэн ымылъэкIынэу унашъо шIыгъэныр ары.

Мыекъопэ къэлэ администрацием предпринимательхэмрэ полицием иIофышIэхэмрэ игъу­сэхэу мы гумэкIыгъом идэгъэзыжьын дэлэжьэнхэм, щынэгъон­чъэу ыкIи гупсэфэу цIыфхэм загъэпсэфыным анаIэ тырагъэ­тыным зэхэсыгъом хэлэжьа­гъэхэм дырагъэштагъ.

КIАРЭ Фатим.