Адыгеим и ЛIышъхьэу КъумпIыл Мурат Адыгеим щыщхэр дзэ Iоф­хэм зыщафагъасэхэрэ ятIонэрэ под­разделением — Мыекъопэ реактивнэ артиллерийскэ дивизионыр зы­дэщыт чIыпIэм щыIагъ. СССР-м и ЛIы­хъужъэу Андырхъое Хъусен ыцIэ зы­хьы­рэ артиллерийскэ дивизионэу ти­чIыпIэгъухэр зыхахьэрэр зэхащэгъагъ.

Республикэм ипащэ дзэ къу­лыкъушIэхэм адэгущыIагъ, япшъэрылъхэм ягъэцэкIэнкIэ дзэкIолIхэмрэ офицерхэмрэ ящыкIэгъэ пкъыгъохэр яIэмэ кIэупчIагъ.

Iофтхьабзэм джащ фэдэу хэлэжьагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард, АР-м иветеранхэм я Совет итхьаматэу Къоджэ Аслъан.

Дзэ частым ипащэхэм къызэраIуагъэмкIэ, артдивизионым хэт пстэуми зэзэгъыныгъэ шIыкIэм тетэу къулыкъур ахьы. Джыдэдэм ахэм дзэ Iофхэм зафагъасэ, хэушъхьафыкIыгъэ дзэ операциер зыщыкIорэ чIыпIэм шIэхэу ащэщтых. ИщыкIагъэм фэдиз Iашэрэ шъуашэрэ подразделением иI. Респуб­ликэмрэ муниципалитетхэмрэ япащэхэр, партиеу «Единэ Рос­сием» ишъолъыр къутамэ, бизнесменхэр, Адыгеим щыпсэу­хэрэр ренэу ахэм IэпыIэгъу афэхъух. Зэзэгъыныгъэ шIыкIэм тетэу хэушъхьафыкIыгъэ дзэ операцием хэлажьэхэрэм республикэ ахъщэ IэпыIэгъур икъоу аIукIагъ.

КъумпIыл Мурат зэ­рэхигъэунэфыкIыгъэмкIэ, республикэм тапэкIи Адыгеим щыщхэм къулыкъу зыщахьырэ дзэ подразделение пстэуми IэпыIэгъу аритызэ ышIыщт. АР-м и ЛIышъхьэрэ АР-м иминист­рэхэм я Кабинетрэ я Адми­нистрацие, ведомствэ гъэнэфагъэхэм под­разделениехэм япащэхэмрэ ядзэкIолIхэмрэ зэпхыныгъэ адыряIэ зэпыт, ахэр зыфэныкъохэр псынкIэу афа­гъэцакIэ.

«Урысыем и Президентэу Владимир Путиным хэгъэгум ишъолъырхэм япащэхэм пшъэ­рылъ афишIыгъ хэушъхьафы­кIыгъэ дзэ операцием хэла­жьэхэрэм IэпыIэгъу арагъэгъотызэ ашIынэу. Къэралыгъом ипащэ иеплъыкIэ сэри десэгъа­штэ: тихэгъэгу зыухъумэхэрэр зэкIэ лIыхъужъ шъыпкъэхэу плъытэмэ хъущт. ХэушъхьафыкIыгъэ дзэ операцием хэла­жьэхэрэм федеральнэ, респуб­ликэ IэпыIэгъур аIэкIэхьаным гъунэ лъытфыщт, дзэкIолIхэми, ахэм яунагъохэми тишIуагъэ зэрядгъэкIырэр лъыдгъэкIотэщт. Анахьэу мэхьанэ зиIэр амалэу зетхьэхэрэр текIоныгъэм икъы­дэхынрэ цIыфхэм ящыIэныгъэ къэгъэнэжьыгъэнымрэ афэIорышIэнхэр ары», — къыIуагъ КъумпIыл Мурат.

Адыгеим и ЛIышъхьэ Мые­къопэ реактивнэ артиллерийскэ дивизионым идзэ къулы­къушIэхэм дзэкIолIхэм ящыкIэгъэ оборудованиеу, шъуашэу афащагъэр аритыжьыгъ. Рес­публикэ бюджетым имылъкукIэ сомэ миллион 12 фэдиз зыосэ УАЗ-и 4, зэпхыныгъэмкIэ амалхэр, Iэмэ-псымэ зэфэшъхьафхэр ыкIи нэмыкIхэр къащэ­фыгъэх. Сомэ миллиони 6-м ехъу зытефэщт пкъыгъохэр: квадрокоптерхэр, нэрыплъэхэр, бензогенераторхэр, аптечкэхэр ыкIи нэмыкIхэр джыри хэу­шъхьафыкIыгъэ дзэ операцием хэлажьэхэрэм афаугъои.

АР-м и ЛIышъхьэ ипресс-къулыкъу Сурэтхэр: А. Гусев.